काठमाडौं/गण्डकी प्रदेशसभा बैठकमा सोमबार एक नाटकीय क्षण देखिएको छ, जब नेकपा माओवादी केन्द्रका सांसद तथा गण्डकीका पूर्व भौतिक पूर्वाधार मन्त्री रेशम बहादुर जुग्जालीले बजेटप्रति आक्रोश व्यक्त गर्दै रोष्ट्रममै बजेट पुस्तिका च्यातिदिए।
प्रदेश सरकारको भौतिक पूर्वाधार मन्त्रालयअन्तर्गतको वार्षिक कार्यक्रममाथि छलफल भइरहेका बेला सांसद जुग्जालीले प्रस्तुत बजेट पूर्वाग्रही र योजनाविहीन भएको आरोप लगाए। उनले बजेट धार्मिक केन्द्रहरूमा मात्र केन्द्रित भएको भन्दै व्यङ्ग्य गर्दै भने, “अहिलेको बजेटबाट सबैभन्दा बढी देवीदेवता नै खुसी भएका होलान्।”
म्याग्दी जिल्लाको दुर्गम क्षेत्र गुर्जादेखि नारच्याङ हुँदै दारखोलासम्मको अवस्थाबारे संकेत गर्दै उनले भौतिक तथा अर्थमन्त्रीलाई स्थल अवलोकन गर्न सुझाव दिए।
सांसद जुग्जालीले बजेटको दिशाविहीनतालाई आलोचना गर्दै भने, “यो बजेट सगरमाथा जान खोजेको हो तर हिन्दसागर पुग्न लागेकोजस्तो देखिन्छ।”
उनको यस प्रष्ट र चर्को विरोधले प्रदेशसभामा हलचल सिर्जना गरेको छ।
