२७ फागुन, काठमाडौं । लुम्बिनी प्रदेशमा जारी प्रधानमन्त्री कप पुरूष राष्ट्रिय क्रिकेट प्रतियोगितामा आज दुई खेलहरू भइरहेका छन् ।
सिदार्थ रंगशालामा जारी खेलमा मधेश प्रदेशले कोशी प्रदेशलाई बलियो लक्ष्य प्रस्तुत गरेको छ । टस जितेर पहिले ब्याटिङ गरेको मधेशले ५० ओभरमा ६ विकेट गुमाएर २८४ रन बनायो ।
मधेशका लागि पवन सर्राफले सर्वाधिक ९२ रन बनाए । चोटका कारण लामो समयपछि क्रिकेटमा फर्केका सर्राफले पहिलो खेलमै लय देखाए ।
कप्तान अनिल साहले ७५ तथा दिपेश दासले अविजित ५६ रन बनाए । हरिशंकर साहले २९ रन बनाए ।
कोशीका लागि बिपिन महतो र प्रकाश कार्कीले २-२ विकेट लिए भने फिर्दोश अन्सारी र दिपेश कँडेलले १-१ विकेट लिए ।
कोशीले पहिलो खेलमा लुम्बिनीसँग पराजित भएको थियो । मधेशले आज पहिलो खेल खेल्दै छ ।
