१ फागुन, जनकपुरधाम। जनकपुरका थप पाँच निजी अस्पतालमा मधेश सरकारले अनुगमन गरेको छ । मुख्यमन्त्री सतिशकुमार सिंह र स्वास्थ्य तथा जनसंख्यामन्त्री सत्रुधनप्रसाद सिंहसहितको टोलीले बिहीबार साँझ पाँचवटा निजी अस्पतालमा अनुगमन गरेका हुन् ।
अनुगमनको क्रममा दुईवटा विना दर्ता पाइएको छ, र अन्यको मापदण्डमा त्रुटि रहेको फेला परेको छ । जनकपुरको पीडारीचोकस्थित जनकपुर मधेश होस्पिटल र रामानन्दचोकमा रहेको जनकपुर गोल्डेन अस्पताल दर्ताविनै संचालनमा रहेको पाइएको छ ।
दुवै अस्पताललाई शुक्रबार बिहानसम्म विरामीलाई अन्यत्र व्यवस्थापन गरेर ११ बजेसम्म बन्द गर्न मुख्यमन्त्री सिंहले निर्देशन दिएका छन् । जनकपुरको सुरक्षा अस्पतालमा अनुगमन गर्दा नवीकरण फेल भएको, सरसफाइमा त्रुटि रहेको पाइएको छ ।
सरसफाइमा ध्यान दिन र कागजातसहित भोलि मन्त्रालयमा उपस्थित हुन निर्देशन मुख्यमन्त्रीले निर्देशन दिए । स्वास्थ्य तथा जनसंख्या मन्त्रालयका निमित सचिव राजेश मिश्रका अनुसार जिरोमाइलमा रहेको ज्योति आँखा अस्पतालका संचालकबाहिर रहेकाले भोलि कागजात लिएर मन्त्रालयमा हाजिर हुन निर्देशन दिइएको छ ।
यस्तै, हिरा हस्पिटल मात्र दर्ता कागजात दुरुस्त रहेको पाइएको छ । यधपी, ५० बेडको उक्त हस्पिटलमा आकस्मिक कक्षमा ५ वटा मात्र बेड हुनुपर्नेमा ८ वटा रहेको पाइएको छ । आकस्मिक कक्षमा तीनवटा बेड घटाउन निर्देशन दिइएको निमित्तसचिव मिश्रले बताए ।
यसअघि शनिबार मुख्यमन्त्री सिंहले २० वटा निजी हस्पिटलमा छड्के अनुगमन गरेका थिए । त्यसक्रममा दर्ता नरहेकालाई भोलिपल्टै विरामीलाई अन्यत्र अस्पतालमा व्यवस्थापन गरेर बन्द गर्ने निर्देशन दिएको थियो । तीनवटा अस्पतालले बन्द गरे पनि अन्य केही दर्ता बिनाको हस्पिटलले अटेर गरेको थियो ।
अटेर गरेर चलाएको पाइएपछि जनकपुर मोर्डन अस्पताललाई आजै बन्द गरिएको छ भने त्यसका संचालक रामभरोश महतोलाई मन्त्रालयले नियन्त्रणमा लिएर प्रहरीलाई जिम्मा लगाएको छ ।
