मकवानपुर । बागमती प्रदेशको राजधानीसमेत रहेको मकवानपुरको हेटौँडा उपमहानगरपालिकालाई आज बालमैत्री स्थानीय शासनयुक्त उपमहानगरपालिका घोषणा गरिएको छ ।
आज एक समारोहका बीच नेपाल सरकारका उपप्रधान तथा सहरी विकास मन्त्री प्रकाशमान सिंहले उपमहानगरपालिकालाई बालश्रम मुक्त, बालविवाह मुक्त तथा बालमैत्री स्थानीय शासनयुक्त उपमहानगरपालिका घोषणा गर्नुभयो ।
उपप्रधानमन्त्री सिंहले बागमती प्रदेशको राजधानी, मकवानपुर जिल्ला, हेटौँडा उपमहानगरपालिकाका ३६ हजार ८२२ घरधुरी, ८७ हजार ५४८ महिला र ८८ हजार ६०७ पुरुष गरि जम्मा १ लाख ७६ हजार १६३ जनसङ्ख्या (५० हजार १८५ बालबालिका), भएको भौगोलिक र साँस्कृतिक विविधतायुक्त यस उपमहानगरपालिकाले स्थानीय सरकार सञ्चालन ऐन २०७४ को परिच्छेद ३ को दफा १२ को उपदफा २ को (ग), बालमैत्री स्थानीय शासन कार्यान्वयन निर्देशिका २०७८ तथा बालमैत्री स्थानीय शासन घोषणा कार्यविधि २०७८ ले निर्दिष्ट गरेका सूचक तथा तहगत चरणहरू पुरा गरेको भन्दै बालमैत्री स्थानीय शासनयुक्त उपमहानगरपालिका घोषणा गर्नुभएको थियो ।
बालमैत्री घोषणा सभालाई सम्बोधन गर्नुहुँदै उपप्रधानमन्त्री सिंहले बालबालिकाको सर्वाङ्गीण विकासको लागि राज्यसँगै परिवारको भूमिका महत्वपूर्ण र अपरिहार्य रहेको बताउनुभयो ।
“बालबालिकाको सर्वाङ्गीण विकासमा राज्यसँगै परिवारको ठूलो र अपरिहार्य भूमिका छ । यसलाई सबैले ग्रहण गर्न आवश्यक छ”, उहाँले भन्नुभयो । परिवारले नै प्रत्येक बालबालिकालाई एक असल सन्तान र एक असल नागरिक बनाउन भूमिका खेल्न सक्ने उहाँको भनाई थियो ।
उपप्रधानमन्त्री सिंहले बालबालिकाको अधिकार तथा नागरिकको मौलिक हक प्रत्याभूत गर्ने सवालमा स्थानीय तहदेखि प्रदेश र संघ सरकारले काम गरिरहेको बताउनुभयो । संविधानमै बाल अधिकारलाई मौलिक अधिकारको रुपमा उल्लेख गरेको जानकारी दिँदै उहाँले तीनै तहका सरकारहरूले अब उपयुक्त योजना र रणनीतिसहित बालबालिकाको क्षेत्रमा लगानी बढाउनुपर्नेमा जोड दिनुभयो । बालमैत्री स्थानीय शासनयुक्त उपमहानगर घोषणासँगै यसको दिगोपनमा सबै गम्भीर बन्नुपर्ने उहाँको भनाई थियो ।
हेटौँडा व्यवस्थित सहरको रुपमा विकास भइरहेको उल्लेख गर्नुहुँदै उहाँले नगरपालिकाबाट विस्तार हुँदै उपमहानगरपालिका र अब महानगरपालिकामा परिणत हुने चरणमा रहेको बताउनुभयो ।
हेटौँडा उपमहानगरपालिका मकवानपुर जिल्लाको चौँथो स्थानीय तहका रुपमा बालमैत्री शासनयुक्त घोषणा भएको छ । मकवानपुरको १० पालिकामध्ये यसअघि मकवानपुरगढी गाउँपालिका, मनहरी गाउँपालिका र बकैया गाउँपालिका बालमैत्री स्थानीय शासनयुक्त पालिका घोषणा भइसकेका छन् ।
हेटौँडा उपमहानगरपालिकाकी मेयर मिनाकुमारी लामाको अध्यक्षतामा भएको घोषणा कार्यक्रममा बागमती प्रदेशका कार्यवाहक मुख्यमन्त्री प्रकाश श्रेष्ठ, संघीय सांसद दिपक बहादुर सिंह, प्रदेश सांसदहरु इन्द्रबहादुर बानिया, एकालाल श्रेष्ठ, प्रेमबहादुर पुलामीलगायतको आतिथ्यता थियो ।
