१२ मंसिर, काठमाडौं । नेपाल प्रिमियर लिग एनपीएल मा सुदूरपश्चिम रोएल्सबाट खेल्नका लागि इंग्ल्याण्डका सेफ अली जैब नेपाल आइपुगेका छन् ।
बुधबार साँझ नेपाल आइपुगेका जैबलाई टोलीका अफिसियलहरूले त्रिभुवन अन्तर्राष्ट्रिय विमानस्थलमा स्वागत गरेका थिए ।
ब्याटिङ अलराउन्डर जैबले राष्ट्रिय टोलीबाट नखेले पनि इंग्ल्यान्डको घरेलु क्रिकेटमा खेल्ने गरेका छन् । बाँयाहाते ब्याटिङ गर्ने उनले टी२०मा ७४ खेलमा १४० माथिको स्ट्राइक रेटले १२०० भन्दा बढी रन बनाएका छन् ।
भाइटालिटी ब्लास्टमा मात्रै उनले ११५० भन्दा धेरै रन बनाएका छन् । त्यस्तै स्लो लेफ्ट आर्म बलिङ गर्ने उनले १२ विकेट पनि लिएका छन् ।
उनले बकिङहामसायरको उमेर समूहसहित सिनियर टिम तथा नर्थहाम्पटनसायरबाट खेलेका छन् । त्यस्तै द हन्ड्रेड क्रिकेटमा नर्थन सुपरचार्जर्सबाट खेलेका छन् ।
सुदूरपश्चिमका अन्य विदेशी खेलाडीहरूमा स्कटल्याण्डका ब्याटिङ अलराउन्डर ब्रान्डन म्याकमुलन, यूएईका अलराउन्डर रोहन मुस्तफा, न्युजिल्याण्डका पेस बलर स्कट कुगलेइन छन् । उनीहरू नेपाल आउन बाँकी छ ।
सुदूरपश्चिमको मार्की खेलाडीमा नेपाली राष्ट्रिय टोलीका अलराउण्डर दिपेन्द्रसिंह ऐरी छन् भने प्रशिक्षकमा जगत टमाटा छन् ।
