काठमाडौं । शुक्रबार रातिदेखि परेको अविरल बर्षाका कारण देशका ४५ ठाउँभन्दा बढी क्षेत्रका सडक आवागमन अवरुद्ध भएका छन् ।
नेपाल प्रहरीका अनुसार विपद्जन्य घटनामा परेर स्याङ्जामा तीन, पर्वतमा दुई, काठमाडौँमा एक र काभ्रेमा खोलाले बगाएर दुईजनाको मृत्यु भएको छ ।
दाङमा दुई, तनहुँमा तीन, दोलखामा एक गरी ६ जना बेपत्ता भएका छन् । अहिलेसम्म तनहुँ, गुल्मी ओखल्ढुङ्गामा गरेर सातजना घाइते भएको प्रहरीेले जनाएको छ ।
भारी वर्षाका कारण देशभरकै जनजीवन प्रभावित भएको छ । कोशी नारायणीलगायतका ठूला नदीमा जलसतह उच्च भएको छ भने अन्य साना खोला खहरे पनि उर्लिएको छ । तीनवटै सुरक्षा निकाय हाईअलर्टका साथ प्रभावित क्षेत्रमा परिचालन भई खोज तथा उद्धार जारी राखेका छन् ।
त्यसैगरी बर्षाका कारण भक्तपुरको हनुमन्ते र मनोहरा नदीमा आएको बाढीले चाँगुनारायणका बस्ती डुबानमा परेका छन् ।
