Thursday, July 18, 2024
घरक्राइम चेकएमालेबाट सरकारको समर्थन फिर्ता, मन्त्रीहरूले राजीनामा बुझाउँदै

एमालेबाट सरकारको समर्थन फिर्ता, मन्त्रीहरूले राजीनामा बुझाउँदै

काठमाडौं/नेकपा (एमाले) ले प्रधानमन्त्री पुष्पकमल दाहाल ‘प्रचण्ड’ नेतृत्वको सरकारलाई दिएको समर्थन फिर्ता लिने निर्णय गरको छ ।

एमालेबाट सरकारमा सहभागी ८ जना मन्त्रीहरूले पनि बुधबार साँझ नै प्रधानमन्त्रीलाई राजीनामा बुझाउने भएका छन्।

एमाले संसदीय दलका प्रमुख सचेतक महेश बर्तौला केही घण्टाभित्र समर्थन फिर्ता लिएको पत्रसहित मन्त्रीहरूले प्रधानमन्त्रीसमक्ष राजीनामा बुझाउने छन् ।

‘हामीले कांग्रेसको समर्थनमा राष्ट्रिय सहमतिको सरकार निर्माणका लागि मार्ग प्रशस्त गर्न समाननीय प्रधानमन्त्रीलाई मंगलबार नै आह्वान गरिसकेका छौँ’, उनले भने, ‘उहाँले मार्ग प्रशस्त गर्ने सम्भावना देखिएन । नयाँ राष्ट्रिय सरकार निर्माणमा अघि बढ्न हाम्रा मन्त्रीहरूले राजीनामा दिएर समर्थन पनि फिर्ता लिने काम आजै भइसक्छ ।’

एमालेबाट सरकारमा रहेका सबै मन्त्रीलाई राजीनामा गराइसकेपछि सरकालाई दिएको समर्थन पनि फिर्ता लिइने भएको छ ।

मंगलबार बसेको सचिवालय बैठकले साँझसम्म प्रधानमन्त्री पुष्पकमल दाहाल प्रचण्डलाई तत्काल राजीनामा दिन भनेको थियो ।

तर, प्रचण्डले राजीनामा नदिएर विश्वासको मतका लागि एक महिनासम्म कुर्ने अडान लिएका छन् । प्रचण्डले राजीनामा नदिने बताएपछि एमालेले आफ्ना सबै मन्त्रीलाई राजीनामा गराउँदै छ ।

यही सोमबार नेपाली कांग्रेस र एमालेबीच नयाँ गठबन्धन सरकार बनाउने सहमति भएको छ । एमाले-कांग्रेस सहमतिअनुसार पहिलो चरणमा एमाले अध्यक्ष केपी शर्मा ओली प्रधानमन्त्री बन्ने निश्चित छ । दोस्रो चरणमा कांग्रेस सभापति शेरबहादुर देउवा प्रधानमन्त्री हुने गरी सहमति जुटिसकेको छ।

प्रचण्ड नेतृत्व सरकारमा एमालेबाट उपप्रधान तथा भौतिक पूर्वाधार एवम् यातायातमन्त्री रघुवीर महासेठको नेतृत्वमा कानुन न्याय तथा संसदीय मामिला मन्त्री पदम गिरी, कृषि तथा पशुपन्छी विकास मन्त्री ज्वालाकुमारी साह, उद्योग, वाणिज्य तथा आपूर्ति मन्त्री दामोदर भण्डारी, भूमि व्यवस्था, सहकारी तथा गरिबी निवारण मन्त्री बलराम अधिकारी, खानेपानीमन्त्री राजेन्द्रकुमार राई, महिला, बालबालिका तथा ज्येष्ठ नागरिक मन्त्री भगवती चौधरी र रक्षामन्त्री हरिप्रसाद उप्रेती छन् ।

अर्को के पढ्ने...
- Advertisment -spot_img
- Advertisment -