काठमाडौं । नेकपा एमालेका नेता भीम रावलले विवादित व्यवसायीलाई पार्टी कार्यालय निर्माणको जिम्मा दिने कार्य मार्क्सवादी र लेनिनवादी आदर्श, सिद्धान्त र मूल्य मान्यता विपरित रहेको बताएका छन् ।
भ्रष्टाचारलाई मुख्य विषयवस्तु बनाएर निर्माण भएको फिल्म ‘छक्कापञ्जा ५’ हेरेपछि बुधबार बेलुका संचारकर्मीसँग कुरा गर्दै नेता रावलले सत्तारुढ एमालेको यो कुरालाई फिल्मले कटाक्ष गरेको बताए ।
‘एमालेले दस्तावेजमा सुशासनको कुरा गर्छ । त्यस्तो राजनीतिक दलले कर सम्बन्धी कुरामा पनि मुद्दा खेपिरहेको, जग्गाको मुद्दामा त दण्ड सजाय नै पाएको व्यवसायीलाई लगेर शिलामा निजको नाम र निजको परिवारलाई नै उपस्थित गराएर त्यहाँ राख्ने, निजले नै बनाउने भन्ने कुरा गम्भीर सिद्धान्त र आदर्शबाट भएको विचलन हो’ नेता रावलले भने ।
देशको प्रधानमन्त्री भएको पार्टीले विवादास्पद गतिविधि र मुद्दामामिलामा मुछिएको व्यक्तिलाई लिएर पार्टी कार्यालय बनाउने भन्ने कुराले सकारात्मक सन्देश नगएको रावलले बताए । ‘एमालेको यो कुरालाई फिल्मले कटाक्ष गरेको छ’ उनले भने ।
उनले एमाले विभाजनको बेला २०५४ सालमा आफू क्षेत्रीय इन्चार्ज हुँदा कार्यकर्तालाई पार्टीमा थेगेर राख्न योगदान दिएको सम्झँदै नेता रावलले त्यतिबेला पार्टी कार्यालय बनाउन आफूले कतैबाट पैसा नलिएको स्मरण गरे ।
उनले फिल्म ‘छक्कापञ्जा ५’ले उठाएको विषय वर्तमान राजनीतिक, कर्मचारीतन्त्रको प्रवृत्तिसँग सान्दर्भिक रहेको बताए । उनले नेपालीले एकपटक फिल्म हेर्नुपर्ने समेत बताए । कथावस्तु र अभिनयले आफूलाई मन छोएको बताउँदै नेता रावलले पछिल्लो समय नेपाली फिल्मले गरेको विकासप्रति उनले खुसी व्यक्त गरे ।
दशैं अष्टमीको दिन (२५ असोज)मा पार्टी अध्यक्ष एवं प्रधानमन्त्री केपी शर्मा ओली, पत्नी राधिका शाक्य तथा व्यापारी दम्पत्ति मीन गुरुङ र सावित्री गुरुङले हिन्दू बिधि बमोजिम केन्द्रीय कार्यालय भवन शिलान्यास गरेका थिए ।
भाटभटेनी संचालक गुरुङले कीर्तिपुर नगरपालिका- २ मैत्रीनगरस्थित १० रोपनी १४ आना जग्गासहित अत्याधुनिक भवनको एमाले केन्द्रीय मूख्यालय भवन निर्माण गरिदिने बचन दिएका छन् । यो कुरालाई लिएर अहिले तीव्र विरोध भैरहेको छ ।
