काठमाडौं/नेपाल प्रहरीका एकजना बहालवाला हवल्दार नै राष्ट्रिय स्वतन्त्र पार्टीको चुनावी प्रचारमा लागेको पाइएको छ।
सामाजिक सञ्जाल फेसबुक र टिकटकसहितमा रास्वपाको प्रचार गरिरहेका उनलाई शुक्रबार जिल्ला प्रहरी कार्यालय पर्साले वीरगञ्जस्थित नेशनल मेडिकल कलेजबाट नियन्त्रणमा लिएको हो।
रवि लामिछाने नेतृत्वको रास्वपालाई सहयोग मिल्ने गरी चुनावी प्रचारमा जुटेका हवल्दार श्यामनारायण पटेललाई नियन्त्रणमा लिएर पर्सा प्रहरीले कारबाही अघि बढाएको हो ।
पटेलले सामाजिक सञ्जालमा रास्वपाको प्रचारसहित भोट दिन आग्रह गरेको पाइएको छ। त्यसपछि उनलाई अनुसन्धानमा तानिएको प्रहरी नायव उपरीक्षक हरिबहादुर बस्नेतले बताएका छन् ।
पटेलको उक्त गतिविधिलाई पर्सा प्रहरीले आचरणविपरीतको कार्य भनेको छ। पटेलको दरबन्दी जिल्ला प्रहरी कार्यालय पर्सामै छ ।
सरकारी सेवामा कार्यरत कुनै पनि व्यक्तिले उम्मेदवार वा दलको दलको पक्षमा प्रचार गर्न निषेध गरिएको छ । अर्कातिर प्रहरी सेवामा रहेका हकमा अझ कडा अनुशासन तय गरिएको हो ।
