काठमाडौँ/रौतहट-२ बाट राष्ट्रिय स्वतन्त्र पार्टी (रास्वपा) का उम्मेदवार सगिर आलम सवार गाडीको ठक्करबाट चार वर्षीया बालिकाको मृत्यु भएको छ।
घटना ईशनाथ नगरपालिका-४, मठिया टोलमा भएको हो। सवारी दुर्घटनामा ज्यान गुमाउने बालिका सोही स्थानकी शेख साजिरकी छोरी अलसा खातुन रहेको पुष्टि भएको छ। स्थानीयका अनुसार दुर्घटना आफ्नै वडाभित्र भएको हो।
प्रत्यक्षदर्शी तथा स्थानीय स्रोतका अनुसार बालिकालाई ठक्कर दिएपछि गाडीमा सवार उम्मेदवार सगिर आलम र चालक घटनास्थलबाट फरार भएका छन्। दुर्घटनामा संलग्न बा.१५ च ४२४४ नम्बरको क्रेटा गाडी भने रौतहट प्रहरीले नियन्त्रणमा लिएको छ।
प्रहरी स्रोतले घटनाबारे थप अनुसन्धान भइरहेको र दोषी ठहरिने व्यक्ति वा व्यक्तिमाथि कानुनी प्रक्रिया अगाडि बढाइने जनाएको छ।
