१० चैत, काठमाडौं । नेपाल कराते महासंघले एरिका गुरुङलाई सम्मानित गर्ने भएको छ । उनलाई ‘हिमालयन वारियर’ उपमानले सम्मान गर्ने निर्णय महासंघले गरेको छ ।
निजगढको बारामा सम्पन्न महासंघको दोस्रो वार्षिक साधारणसभाले उनलाई सो सम्मान गर्ने निर्णय गरेको महासंघले विज्ञप्तिमार्फत जानकारी गराएको छ ।
एरिकाले २० औं एसियन सिनियर कराते च्याम्पियनसिपमा रजत पदक जितेकी थिइन् ।
उनलाई नेपाली करातेको निर्विकल्प स्टारको रुपमा लिइन्छ । अन्तर्राष्ट्रिय प्रतियोगितामा सहभागीता जनाउन थालेपछि उनले कुनै पनि खेलमा खाली हात फर्कनुपरेको छैन ।
त्यस्तै, विश्व कराते महासंघको निर्देशन अनुसार महासंघको विधानमा आवश्यक संशोधन गर्ने निर्णय पनि भएको छ ।
प्रशासनिक तथा व्यवस्थापन सम्बन्धी नियमावली, कार्यविधि तथा निर्देशिका २०८१ अनुमोदन गर्ने निर्णय भएको विज्ञप्तिमा उल्लेख छ ।
राष्ट्रिय टिम तयारीका लागि प्रमुख प्रशिक्षक र टिम म्यानेजर सम्बन्धी कार्यविधि पारित गर्ने निर्णय पनि भएको छ ।
महासंघमा रिक्त पदहरूमा मनोनयन गर्ने अधिकार अध्यक्षलाई प्रदान गर्ने तथा मनोनित सदस्यहरूको अनुमोदन गर्ने निर्णय पनि भएको जानकारी विज्ञप्तिमार्फत गराइएको छ ।
