एकजना भारतीयले संसारमै सबैभन्दा महँगो मूल्यमा एउटा कुकुर किनेका छन् । ब्वाँसो र ककसियन शेफर्ड जातको कुकुरबीच प्रजननबाट जन्माइएको उक्त ठिमाहा कुकुर ५८ लाख १० हजार डलर अर्थात् करिब ८० करोड रुपैयाँमा खरिद गरिएको हो ।
काडाबम्ब ओकामी नामक उक्त कुकुर अमेरिकामा प्रजनन गराइएको थियो । भारतको बैंगलोरस्थित एकजना कुकुरप्रेमी तथा कुकुरका नश्लहरू विकास गर्ने एस सतिस नामका व्यक्तिले ५० करोड भारुमा उक्त कुकुर किने । भारतीय कुकुर नश्ल विकास संघका अध्यक्षसमेत रहेका सतिससँग १५० भन्दा धेरै नश्लका कुकुर छन् । जसमध्ये केही विश्वका सबैभन्दा दुर्लभ नश्ल पनि छन् ।
काडाबम्ब ओकामी कुकुर उक्त नश्लको एकमात्र कुकुर भएकाले त्यसलाई ५० करोड भारु मूल्य पर्नु स्वभाविकै रहेको सतिस बताउँछन् । ८ महिना उमेरको उक्त कुकुरको वजन ७५ केजी र सरीरको उचाइ ३० इन्च रहेको छ ।
सतिसले भनेका छन् – यो कुकुरको अत्यन्तै दुर्लभ नश्ल हो र ठ्याक्कै ब्वाँसो जस्तै देखिन्छ । यो नश्लको कुकुर दुनियाँमा अहिलेसम्म कतै पनि बिक्री भएको छैन । मैले यो कुकुरका लागि त्यहीँ भएर मोटो रकम खर्च गरेको हुँ । मानिसहरु यो कुकुरलाई हेर्न निकै उत्सुक छन् र त्यसको सेल्फी तथा तस्वीर खिच्ने गरेका छन् । म र मेरो कुकुर कुनै फिल्मको कलाकारभन्दा पनि धेरै चर्चित बनेका छौं ।
स्मरण रहोस् कुकुरका लागि उनले ठूलो रकम खर्चिएको यो पहिलोपटक होइन । गत वर्ष उनले ठ्याक्कै रातो पाण्डाजस्तै देखिने चो चो जातको कुकुर ३२ लाख ५० हजार डलरमा किनेका थिए ।
आफ्नो सात हेक्टरमा फैलिएको निवासमा उनले डेढसय वटा कुकुर पालेका छन् । भारतका विभिन्न ठाउँमा हुने कार्यक्रममा उनले तीमध्ये अत्यन्तै दुर्लभ कुकुरहरु प्रदर्शनका लागि लैजान्छन् र त्यसबापत ३ हजार डलर देखि १२ हजार डलर सम्म आम्दानी गर्दछन् ।
संसारकै महँगो कुकुर ओकामीलाई पनि उनले अब यस्तै प्रदर्शनीमा सहभागी गराएर पैसा कमाउने काम सुरु गर्दैछन् । उनले कर्नाटकमा फिल्म प्रिमियर जस्ता हाइप्रोफाइल कार्यक्रमहरुमा ओकामीलाई लगिसकेका छन् ।
