१ फागुन, काठमाडौं । मकवानपुरको मनहरी गाउँपालिका-५ डिल्लीपुर गाउँबाट डेढ महिनाअघि मात्रै काठमाडौं निस्किएका थिए, १८ वर्षीय रविन राई । कमजोर आर्थिक अवस्था र घरको जेठो छोरो भएपछि उनीमाथि जिम्मेवारी थपिँदै थियो ।
सपना पछ्याउँदै शहर छिर्ने योजना बुनेपछि रविनले आमालाई सुनाए, ‘अब म काठमाडौं जान्छु ।’ केही समय काठमाडौंकै कुनै होटलमा काम सिक्ने र अनि विदेश जाने योजना आमालाई सुनाए ।
‘केही समय होटल लाइनमा पसेर काम सिक्छु, अनि विदेश जानुपर्ला,’ उनले घरबाट बिदा हुँदै गर्दा आमालाई भनेका थिए । किशोरावस्थामै उत्साह र जिम्मेवारी बोकेर रविन काठमाडौं आए ।
कमलपोखरीस्थित शान्दार मःम पसलमा काम पाए ।
विदेश जाने सपना बोकेका उनलाई मःम पसलबाट काम सिक्नु थियो । काठमाडौंमा रहुन्जेल दैनिकी सहज बनाउन आम्दानीको बाटो त छँदै थियो । काम पाएपछि रविनले आमालाई तुरुन्तै भनिहाले ।
छोराले काठमाडौंको होटलमा जागिर पाएको सुनेर आमाबुवा नै खुसी थिए ।
‘काम गर्न थालेको मलाई त भनेको थिएन, आमाबाट थाहा पाएँ,’ बुवा राजकुमार सुनाउँछन्, ‘छोराले काम गर्न थालेपछि हामी पनि खुसी थियौं ।’
तर, उनीहरूको खुसी लामो टिकेन ।
०००
गत माघ २४ गते बिहान पौने ९ बजे । उनले काम गर्न थालेको मःम पसलमा सिलिन्डर ग्यास विस्फोट भयो । विस्फोटमा परेर रविनसहित ११ जना गम्भीर घाइते भए । उपचारकै क्रममा गत सोमबार रविनसहित उदयपुरको कटारी नगरपालिका-८ का भीमबहादुर (नवीन) घले मगर कीर्तिपुर अस्पतालमा अस्ताए ।
उमेर ढल्कँदै गएका आमाबुवा, हुर्कंदै गरेका तीन भाइ-बहिनीसहित रविनका सपना पनि अस्ताएका छन् ।
कटारीको गालटारका नवीन पनि सोही पसलमा काम गर्थे । उनी काठमाडौंकै गैरिधारामा डेरा गरेर बस्थे । उनले शान्दार मःममा काम गर्न थालेको ८/९ वर्ष भइसकेको थियो ।
नवीनको निधनपछि श्रीमती साहराविहीन बनेकी छिन् । ४ वर्षीय छोराले कलिलेमै बुवा गुमाएका छन् ।
०००
१८ वर्षीय कलिलो छोरो गुमाएका बुवा राजकुमारलाई घरको ‘खाँबो’ नै भाँच्चिएजस्तो अनुभूति भएको छ । ‘उसको सपनासँगै हाम्रो पनि सपना हरायो,’ राजकुमार भावुक हुँदै सुनाउँछन्, ‘घरको खाँबो नै भाँच्चिएको जस्तो भएको छ ।’
रविन राजकुमारका पहिलो सन्तान हुन् । रविनपछि छोरी र त्यसपछि जुम्ल्याहा छोराछोरी जन्माएका राजकुमार चाहिँ ड्राइभिङ पेसामा छन् । रविन पहिला पनि काठमाडौं बसेका थिए । ८ कक्षामा पढ्दापढ्दै काठमाडौं आएका उनी पछि गाउँ नै फर्किएका थिए ।
डेढ महिनाअघि मात्रै काठमाडौं आएका छोरा सम्झँदै राजकुमार थप्छन्, ‘पहिले पनि केही समय काठमाडौं बसेर गाउँ फर्किएको थियो । उतै हामीलाई सघाएर बसिराखेको थियो । बरु काठमाडौं नआएको भए हुन्थ्यो ।’
०००
कटारीका नवीन पनि घरका जेठा छोरा हुन् । उनका एक भाइ छन् । भाइ पनि काठमाडौंतिरै कामकाजमा लागेका छन् । घरजम गरेर बसेका नवीनले केही वर्षअघि बिहे गरेका थिए । ४ वर्षका छोरा छन् उनका ।
नवीनकी श्रीमती जानकी अत्तालिएकी छिन् । दुखेसो पोख्दै उनले भनिन्, ‘मैले त काम पनि केही जानेको छैन, बाबु पनि सानै छ, उहाँ पनि…(बोली अड्कियो) ।’
श्रीमान् बितेको दिनदेखि उनको सबै सहारा गुमेजस्तो भएको छ । छोराको मृत्युको खबर सुनेपछि आमाबुवा पनि काठमाडौं आएका छन् ।
छोरा गुमाएका उनीहरू बोल्न सक्ने अवस्थामा छैनन् ।
जुन पसलमा काम गर्दागर्दै भएको विस्फोटमा रविन र नवीनले ज्यान गुमाए, त्यही पसल सञ्चालकसँग क्षतिपूर्ति माग गर्दै दुई दिनसम्म प्रहरी कार्यालय धाउनुपर्यो ।
मालीगाउँस्थित प्रहरी वृत्तमा मृतकका आफन्त र मःम पसल सञ्चालकबीच भएको कुराकानीपछि बिहीबार साँझ बल्लतल्ल कुरा मिलेको छ ।
अकालमै ज्यान गुमाएका रविन र नवीनको परिवारसँग क्षतिपूर्तिको विषयमा सहमति भएको छ ।
जिल्ला प्रहरी परिसर काठमाडौंका एसपी तथा प्रवक्ता अपिलराज बोहोराले भने, ‘उहाँहरू कसरी मिल्नुभयो हामीलाई थाहा भएन । तर शव बुझिसक्नुभएको जानकारी आएको छ ।’
४ दिनदेखि अलपत्र परेको उनीहरूको शव भोलि (शुक्रबार) दाहसंस्कार हुने परिवारका सदस्यहरू बताउँछन् ।
उनीहरूको शव हिजो (बुधबार) कीर्तिपुरस्थित बर्न अस्पतालबाट त्रिवि शिक्षण अस्पताल, महाराजगञ्ज ल्याइएको छ ।
सोही विस्फोटमा घाइते भएका अन्य ९ जनाको उपचार जारी छ ।
