यो अप्रिल महिनाको अन्त्य सम्ममा अमेरिकाका विभिन्न १६ वटा राज्यमा झ्याउँकिरीको आक्रमण हुनेवाला छ ।
अंग्रेजीमा सिकाडा भनिने झ्याउँकिरीका करीब १० खर्ब बथानले अमेरिकामाथि आक्रमण गर्नेछन् । त्यसबाट ठूलो परिमाणमा बालीनालीमा क्षति पुग्न सक्नेछ र यातायात समेत प्रभावित हुनसक्छ।
झ्याउँकिरी विभिन्न दुईवटा वर्गका हुन्छन् । एउटा समूहको नाम ब्रूड चौधौं हो, जसलाई ग्रेट साउदर्न ब्रूड पनि भनिन्छ । त्यस्तै दोस्रो वर्ग चाहिं ब्रूड तेह्रौं हो । यसलाई नर्दन इलिनोय ब्रूड पनि भनिन्छ । डरलाग्दो के भने यसपटक यी दुई ब्रूड एकसाथ बाहिर निस्किंदैछन् । ब्रूड भनेको अण्डा वा बच्चा । केही दिनमै ती अण्डाबाट किरा निस्किएर उड्दछन् ।
झ्याउँकिरी किराको प्रकोप हुने एउटा चक्र हुन्छ । अर्थात् निश्चित समयमा यी किरा बाहिर आउँछन् । तर, २२१ वर्षमा पहिलोपटक अहिले दुवै समूहका झ्याउँकिरी एकसाथ अमेरिकामा घुसपैठ गर्न लागेका हुन् ।
नर्दन इलिनोय ब्रूडले १७ वर्षमा एकटपक हमला गर्दछ । जबकि ग्रेट साउदर्न ब्रूडले हरेक १३ वर्षमा ।
यी किराहरु यसपटक २.५४ करोड वर्गकिलोमिटर क्षेत्रमा फैलिनेछन् । यहाँ हरेक एक इन्च क्षेत्रमा एउटा किराको उपस्थिति हुनेछ । यी सबै किराहरुलाई हरेक एक इन्चको दूरीमा राख्दा त्यो यति लामो लाइन बन्नेछ कि पृथ्वीबाट ३३ पटक चन्द्रमामा ओहोर दोहोर गर्न सकिनेछ ।
झ्याउँकिरीले अमेरिकाको जंगल क्षेत्र, खेतबारी तथा हराभरा सबै ठाउँमा नोक्सान पूराउनेछन् ।
अप्रिल महिनाको अन्त्यमा यी किराहरु जमिन बाहिर निस्किनेछन् । यो पूर्णरुपमा तापक्रममा निर्भर गर्दछ । तर त्यसअघि हल्का वर्षा तथा आद्रता आवश्यक हुन्छ । यी सबै वातावरणीय अनुकूलता हुँदा किराहरु तिव्र रुपमा बाहिर निस्किनेछन् । भोकाएका ती झ्याउँकिरीहरु सिधै बालीनाली, फलफूल तथा हरेक रुखहरुमाथि आक्रणमा उत्रिनेछन्, प्रजनन गर्नेछन् र बच्चालाई हुर्काउनेछन् ।
झ्याउँकिरीको आक्रमणबाट अमेरिकाको लुसियाना, दक्षिणी अर्कन्सस, अलाबामा, मिसिसिपी, उत्तरी जर्जिया, साउथ क्यारोलिना, टेनेसी, मिसौरी, इनिलोय, केन्टकी, इण्डियाना, विसकन्सिन तथा अयोवा राज्यहरु प्रभावित हुनेछन् । यो आक्रमण अप्रिलको अन्तिमबाट सुरु भएर ६ हप्तासम्म जारी रहनेछ ।
यी झ्याउँकिरीहरुले मानिसलाई आक्रमण गर्ने तथा रोगब्याधी सार्ने आदि गर्दैनन् । तर निकै ठूलो आवाज निकाल्छन् । यिनीहरु न त राम्रोसँग उड्न जान्दछन्, न त राम्रोसँग कतै अवतरण गर्न नै । यिनीहरु यत्रतत्र खस्दछन् र खसेको ठाउँमा चिप्लो पदार्थ छाड्दछन् र फोहोर पनि गराउँछन् ।
