१८, चैत काठमाडौं । नेपाल विद्युत प्राधिकरणको अनबन्डलिङ नीति अन्तर्गत गठन गरिएको राष्ट्रिय प्रसारण ग्रिड कम्पनी लिमिटेड (आरपीजीसीएल) को प्रमुख कार्यकारी अधिकृत (सीईओ) पदमा इञ्जिनियर सागर श्रेष्ठ नियुक्त भएका छन् ।
उनलाई ४ वर्षको कार्यकालका लागि नियुक्त गरिएको हो । सात जना उम्मेदवारमध्ये अन्तिम प्रस्तुति तथा अन्तर्वार्ताबाट छनोट गर्दै उनलाई कम्पनीको नेतृत्व सुम्पिएको हो ।
इञ्जिनियर श्रेष्ठ ऊर्जा क्षेत्रका अनुभवी व्यक्ति हुन् । उनले भारतको प्रतिष्ठित आईआईटी रुड़की विश्वविद्यालयबाट स्नातकोत्तर गरेका छन् ।
हाल ग्रिड कम्पनीसँग करिब ११० अर्ब रुपैयाँ बराबरको ११ वटा परियोजनाहरूको पोर्टफोलियो छ । कम्पनीले नेपालको विद्युत प्रसारण प्रणालीलाई व्यवस्थित, भरपर्दो तथा प्रभावकारी बनाउन महत्वपूर्ण भूमिका खेल्दै आएको छ । इञ्जिनियर श्रेष्ठको नेतृत्वमा कम्पनीले विकास भइरहेका परियोजनाहरूलाई सफलतापूर्वक अगाडि बढाउने अपेक्षा गरिएको छ ।
उनले नेपाल इञ्जिनियरिङ परिषद्को सञ्चालक समिति सदस्यको रूपमा सेवा गरिरहेका छन् भने नेपाल इञ्जिनियर्स संघका कार्यसमिति सदस्य हुन् । उनी काभ्रेपलाञ्चोकको नमोबुद्ध नगरपालिका–७, दाप्चा निवासी हुन् ।
