काठमाडौं । ‘पुष्पा २’ को प्रिमियरका क्रममा एक महिलाको मृत्यु भएको घटनामा पक्राउ परेका तेलुगु सुपरस्टार अल्लु अर्जुनलाई भारतको हैदराबाद अदालतले १४ दिनका लागि न्यायिक हिरासतमा पठाएको छ ।
शुक्रबार बिहान उनको घरबाट पक्राउ गरिएका अल्लुलाई दिउँसो ४ बजे अदालतमा हाजिर उपस्थित गराइएको थियो । अल्लुमाथि डिसेम्बर ४ मा हैदरावादको सन्ध्या थिएटरमा प्रहरीलाई पूर्वसूचना नदिई प्रिमियर समारोहमा सहभागी भएको आरोप छ । त्यसक्रममा भएको भीडमा भागदौड मच्चिंदा एक महिलाको मृत्यु भएको थियो भने थुप्रै घाइते भएका थिए ।
यस घटनापछि प्रहरीले सन्ध्या थिएटरका सञ्चालक, अल्लु अर्जुन र उनको सुरक्षा टोलीविरुद्ध मुद्दा दर्ता गराएको थियो । यसैबीच, अभिनेता अल्लुले महिलाको मृत्युको मामिलामा दर्ता भएको एफआईआर खारेज गर्न उच्च अदालतमा अपील गरेका छन् ।
अल्लु अर्जुन र उनको टोलीले पनि ती महिलाको मृत्युमा शोक व्यक्त गरेका थिए । अभिनेताले मृतकका परिवारप्रति समवेदना प्रकट गर्दै उनीहरुलाई भेटेका थिए । उनले २५ लाख रुपैयाँ सहयोग गर्ने वाचा पनि गरेका थिए ।
भारतीय सञ्चारमाध्यमका अनुसार अल्लु अर्जुनले आफ्नो गिरफ्तारीको शैलीप्रति आपत्ति जनाएका छन् । प्रहरीले बिहानको खाजा खान र लुगा फेर्न समेत नदिएको उनको दाबी छ ।
भएको के हो ?
डिसेम्बर ४ मा अल्लु अर्जुन विना जानकारी फिल्म ‘पुष्पा २’ प्रदर्शनका लागि हैदरावादको सन्ध्या थिएटरमा पुगेका थिए । फ्यान उनलाई भेट्न आतुर थिए । फ्यानको ठूलो संख्या उनीसँगै थिएटरमा प्रवेश गर्न खोज्दा ठूलो भीड जम्मा भयो र त्यसपछि मानिसलाई श्वास फेर्न समेत कठिन हुने स्थिति बन्यो ।
भीडलाई नियन्त्रणमा लिन प्रहरीले हल्का लाठी चार्ज गरेको थियो । भीड कम भएपछि निसास्सिएर बेहोस भएका मानिसलाई अस्पतालमा भर्ना गरिएको थियो । तर त्यही क्रममा अस्पतालमा एक महिलालाई चिकित्सकले मृत घोषणा गरेका थिए ।
अल्लु अर्जुनको पछिल्लो फिल्म ‘पुष्पा २’ ले बक्स अफिसमा आक्रामक कमाइ गरिरहेको छ । उनी अहिले गुगलमा ट्रेन्डिङमा छन् ।
