१४ मंसिर, धनगढी । अछाममा बिहीबार राति आफैंमाथि गोली चलाएका प्रहरी सहायक निरीक्षक(असई) असई किसनबहादुर चन्दले कैलालीमा प्रहरी निरीक्षक (इन्सपेक्टर) लाई पेस्तोल ताकेको खुलेको छ ।
चन्द २०७६/७७ को कोराना महामारीका बेला जिल्ला प्रहरी कार्यालय कैलालीमा कार्यरत थिए । सोही बेला उनले आफ्ना कमान्डर समेत रहेका प्रहरी निरीक्षक लक्ष्मीराज जोशीलाई पेस्तोल ताकेका थिए ।
चन्दले मदिरा सेवन गरेर प्रहरी निरीक्षक जोशीलाई गोली ताकेको विषयले कैलाली प्रहरी वृत्तभित्र चर्चा पाएको थियो । जिल्ला प्रहरी कार्यालयले चन्दलाई कारबाही गर्न खोजेपछि परिवारसहित आएर हारगुहार गरेका थिए ।
उनी र उनको परिवारले प्रहरी निरीक्षक जोशीसँग माफी माग्दै पुनः त्यस्तो नदोहोर्याउने प्रतिबद्धता जनाएका थिए । त्यसपछि भने उनीमाथि कारबाही रोकिएको प्रहरी स्रोत बताउँछ ।
प्रहरी निरीक्षक जोशीलाई गोली ताकेको चार वर्षपछि बिहीबार भने चन्दले आफैंमाथि गोली चलाएका छन् । तुर्माखाद गाउँपालिका–३ को भैरवस्थान प्रहरी चौकीका इन्चार्ज समेत रहेका चन्द आफैंले बोकेको पेस्तोल बाँया छातीमा प्रहार गरेपछि घाइते भएका छन् ।
उनको कोहलपुर मेडिकल कलेजमा उपचार भइरहेको छ । घटनाबारे छानबिनका लागि गर्न जिल्ला प्रहरी कार्यालयले इलाका प्रहरी कार्यालय कमलबजारका प्रमुख प्रहरी निरीक्षक हर्षबहादुर चन्दको नेतृत्वमा पाँच सदस्यीय समिति गठन गरेको छ ।
