१३ भदौ, काठमाडौं। नेकपा एकीकृत समाजवादीले स्थानीय तहमा हुने उपचुनावको तयारी अहिलेबाटै थालेको छ ।
बिहीबार सम्पन्न केन्द्रिय कमिटीबाटै उपचुनावको तयारी थाल्ने निर्णय गरेको हो । जसका लागि वरिष्ठ उपाध्यक्ष राजेन्द्र पाण्डेको नेतृत्वमा केन्द्रीय परिचालन कमिटी बनाउने निर्णय भएको छ ।
यो कमिटीमा महासचिव घनश्याम भूसाल बाहेक अरु पदाधिकारी रहनेछन् । ‘महाधिवेशनपछि लगभग हाम्रो पार्टीको संरचनाले पूर्णता पाएको छ । अब चाँडै केन्द्रिय नेताहरुको कार्य विभाजन हुन्छ’ नवनिर्वाचित उपाध्यक्ष जगनाथ खतिवडाले भने, ‘तर उपचुनावको तयारी थाल्ने निर्णय गरिसकेका छौं ।’
उनका अनुसार केन्द्रमा वरिष्ठ उपाध्यक्ष पाण्डेको नेतृत्वमा परिचालन कमिटी बनेको छ भने अरु नेताहरुलाई कार्य क्षेत्रमा केन्द्रित हुन निर्देशन दिइएको छ ।
केन्द्रिय सदस्यहरुको कार्यविभाजन गर्ने जिम्मा भने स्थायी कमिटीलाई दिइएको छ । बिहीबारको बैठकले पदाधिकारी रहनेगरी स्थायी कमिटी गठन गरेको छ ।
मंगलबारको बैठबाट पदाधिकारी र पोलिटब्यूरो चयन भएका छन् । असार दोस्रो साता सम्पन्न दशौं महाधिवेशनबाट माधवकुमार नेपाल अध्यक्ष, झलनाथ खनाल सम्मानित नेता र घनश्याम भूसाल महासचिव निर्विरोध भएका थिए ।
मंगलबार राजेन्द्र पाण्डे वरिष्ठ उपाध्यक्ष निर्विरोध भएका थिए । बाँकी १७ पदाधिकारी र १०५ सदस्यीय पोलिटब्यूरो मतदानबाट टुंगिएको थियो ।
यसपछि बिहीबार बसेको केन्द्रिय कमिटी बैठकले मंसिरभित्र प्रदेश र चैतभित्र जिल्ला कमिटीको अधिवेशन सक्ने निर्णय समेत भएको छ ।
