काठमाडौं- राष्ट्रिय प्रजातन्त्र पार्टीका प्रमुख सचेतक ज्ञानेन्द्र शाहीले सहकारी ठगी प्रकरणमा मुछिएर फरार गितेन्द्रबाबु राई (जीबी) लाई छिटोभन्दा छिटो पक्राउ गरेर स्वदेश ल्याउन माग गरेका छन् ।
प्रतिनिधिसभाको मंगलबारको बैठकमा सांसद शाहीले अहिलेको अवस्था हेर्दा देशभन्दा ठूलो जीबी राई देखिएको भन्दै उनलाई छिटोभन्दा छिटो पक्राउ गरि स्वदेश ल्याउन माग गरेका हुन् ।
‘आकाश-पाताल जहाँबाट भए पनि राईलाई पक्राउ गरेर ल्याउछौँ भनेर गृहमन्त्रीले भनेको हो’, उनले भने, ‘कहिले पक्रेर ल्याउने हो ? हामी हेरेर बसिरहेका छौँ ।’
शाहीले अहिले साना-साना काण्ड मात्रै नभई भ्रष्टाचार र अनियमितताका ठूला फाइल पनि खोल्न सुझाव दिए ।
उनले गिरीबन्धु प्रकरणका विषयमा पनि छानबिन गर्दै सत्यतथ्य संसद्लाई जानकारी गराउन पनि सरकारसँग माग गरेका छन् ।
शाहीले भारत भ्रमणका क्रममा नेपालका प्रधानमन्त्री पुष्पकमल दाहाल प्रचण्डलाई कुनै प्रदेशको मुख्यमन्त्री जस्तो सम्मान र व्यवहार गरिएको भन्दै आपत्ति जनाए ।
