९ मंसिर, काठमाडौं । सन्तोष गोङ्गबाले ह्याट्रिक गरेपछि एनआरटीले ललित स्मृति एन्फा यू-१८ युथ लिगमा आइतबार चर्च ब्वाइज युनाइटेडलाई ३-० ले पराजित गरेको छ ।
सहज जितपछि एनआरटीले शीर्ष स्थानको नेपाल पुलिससँग अंकदूरी १ मा झारेको छ । १२ खेलबाट एनआरटीले २५ अंक जोडेको छ । एक खेल कम खेलेको पुलिसको २६ अंक छ ।
सातदरोबाटोस्थित एन्फा कम्प्लेक्समा भएको खेलमा एनआरटीका लागि सन्तोषले पहिलो हाफमै ह्याट्रिक गरेका थिए । उनले १७औं, २२औं र २९औं मिनेटमा गोल गरे ।
पराजित चर्च ब्वाइज १२ खेलबाट १४ अंकसहित नवौँ स्थानमै छ ।
सोमबारै भएको अर्को खेलमा टेबलको बटममा रहेका दुई टोली एफसी खुमलटार र सातदोबाटो युथ क्लब भिडेका थिए । जहाँ अन्तिम स्थानको सातदोबाटोले खुमलाटारलाई ५-२ ले पराजित गर्दै एक स्थान माथि उक्लियो भने खुमलटार पूछारमा झरेको छ ।
सातदोबाटोले १२ खेलबाट ७ अंक जोडेको छ । समान खेलबाट खुमलटारको ४ अंक मात्र छ ।
