१९ असोज, काठमाडौं । नेपाल प्रिमियर लिग (एनपीएल) को अक्सन आइतबार काठमाडौंमा हुँदैछ । दिउँसो दुई बजेदेखि सुरु हुने अक्सनमा १५० भन्दा खेलाडी सहभागी हुनेछन् ।
क्यानले यसअघि कुल ४२६ दर्ताबाट अक्सनलाई १४२ खेलाडीको सूचि सार्वजनिक गरेको थियो । जसमा ए ग्रेडका २७, ग्रेड बी मा ३८ र ग्रेड सी मा ७७ खेलाडी छन् ।
तर सर्ट लिष्टमा केही खेलाडी छुटेको हुँदा थपिने नेपाल क्रिकेट संघ (क्यान) का सचिव पारस खड्काले जानकारी दिएका छन् ।
एनपीएलमा सहभागी ८ टोलीका सबै मार्की खेलाडी नेपाली टोलीसँगै क्यानडामा छन् । मार्की खेलाडीकै सहमतिमा टिमले खेलाडी किन्ने हुँदा दिउँसो दुई बजेको समय राखिएको छ ।
मार्की खेलाडी र टिम संख्या
काठमाडौं गुर्खाजमा करण केसी, पोखरा एभेन्जर्समा कुशल भुर्तेल, चितवन राइनोजमा कुशल मल्ल, लुम्बिनी लायन्समा रोहित पौडेल, विराटनगर किंग्समा सन्दीप लामिछाने, जनकपुर रोयल्समा आसिफ शेख, कर्णाली याक्समा सोमपाल कामी र सुदूरपश्चिम रोयल्समा दीपेन्द्रसिंह ऐरी मार्की खेलाडी छन् ।
एक टिममा कुल १६ खेलाडी हुनेछन् । अक्सनमा भने १० खेलाडी मात्रै किन्नुपर्ने हुन्छ । चार विदेशी खेलाडी आन्तरिक सहमतिमा भित्र्याउनेछन् । अर्थात विदेशी खेलाडी अक्सनमा हुने छैनन् ।
एक ट्यालेन्ट हन्टबाट खेलाडी राख्नुपर्छ । टिममा १६ खेलाडी भएपनि ट्यालेन्ट हन्टबाट चाहेको खण्डमा फ्रेन्चाइज टोलीले चार भन्दा बढी राख्न पाउँछन् । तर अन्तिम १६ सदस्य लिष्टमा भने एक जना मात्रै ट्यालेन्ट हन्टको खेलाडी राख्न पाइनेछ ।
अक्सनमा कसले कति मूल्य पाउँछन् ?
ग्रेड सी मा का खेलाडीको न्यूनतम २ र उच्चतम ५ लाख रुपैयाँ तोकिएको छ । ग्रेड बी मा न्यूनतम ५ लाख र उच्चतम १० लाख छ । ग्रेड ए मा न्यूनतम १० र उच्चतम १५ लाख राखिएको छ ।
उच्चतम मूल्यमा गएपछि सबै ग्रेडका खेलाडी लक्की ड्रबाट निर्धारण हुनेछ । एक टोलीले ए र सी ग्रेडका समान तीन तथा बी ग्रेड का चार खेलाडी टोलीमा अनिवार्य राख्नुपर्ने हुन्छ ।
खर्च गर्न पाउने रकम ?
अक्सनमा एक टोलीले कुल ९० लाख खर्च गर्नुपर्ने हुन्छ ।
टिमलाई खेलाडी छान्न अवसर
क्यानले सर्ट लिष्टमा छुटेकाहरुको नाम समटे्दै शनिबार साँझ सम्म सार्वजनिक गर्ने जनाएको छ । १६० सम्म पुग्ने सम्भावना छ ।
त्यति मात्रै होइन क्यानले कुल दर्ता गराएका ४२६ खेलाडीको नाम पनि दिएको छ । उक्त सूचिबाट सर्ट लिष्टमा नपरेका तीन तीन खेलाडी माग गर्न क्यानले अधिकार पनि दिएकोछ ।
अनसोल्ड भएका खेलाडीलाई फेरि मौका
कुनै खेलाडी पहिला अनसोल्ड भएमा अन्तिममा फेरि मौका पाउनेछन् । कुनै खेलाडी ए ग्रेडमा अनसोल्ड भएमा बी ग्रेडमा घटुवा हुनेछन् । बी ग्रेडमा अनसोल्ड भएका खेलाडी सी मा झर्नेछन् ।
अन्तिममा सबै टोलीलाई क्यानले बिक्री नभएका खेलाडीको लिष्ट दिनेछ । फ्रेन्चाइज टोलीले आफूलाई आवश्यक खेलाडी रोज्न पाउनेछन् । एक भन्दा बढी टोलीले उक्त खेलाडी छानेको खण्डमा भने पुन अक्सनमा प्रतिस्पर्धा हुनेछ ।
अक्सनमा ए, बी र सीको सबै लिष्ट एकै बक्समा राखिनेछ । चिट्ठा थुत्दा अक्सनमा जुनसुकै ग्रेडका खेलाडी आउन सक्छन् ।
खेलाडी परिवर्तन ?
ट्यालेन्ट हन्टको खेलाडी परिवर्तन गर्नु परेमा त्यहीँबाट आएको खेलाडी राख्नुपर्छ । अक्सनमा नाम दर्ता भएका खेलाडी ग्रेड अनुसार रिप्लेसमेन्ट हुनेछ । ए बाट बी मा झरेको खेलाडी बी रिप्लेसमेन्टमा पनि जानसक्नेछन् ।
अक्सनको लाइभ नेपाल प्रिमियर लिगको आधिकारिक युटुब च्यानलबाट हुनेछ ।
