३० चैत, काठमाडौं । शहिद स्मारक सी डिभिजन लिगमा बिहीबार भएका दुवै खेल बराबरीमा सकिएका छन् ।
सातदोबाटोस्थित एन्फा कम्प्लेक्स मैदानमा भएको दोस्रो खेलमा सामाजिक युथ क्लब र सानेपा क्लबले १-१ को बराबरी खेल्दै अंक बाँडे ।
खेलमा सानेपाले सुरुवाती अग्रता लिए पनि जोगाउन सकेन । खेलको नवौँ मिनेटमा सम्भरत्न सिंह डंगोलले गोल गर्दै सानेपालाई अग्रता दिलाएका थिए। तर ४४औं मिनेटमा सामाजिक युथका लागि युगेश श्रेष्ठले बराबरी गोल फर्काए । दोस्रो हाफमा दुवै टोलीले गोल गर्न नसक्दा खेल बराबरीमा सकियो ।
यसअघि पहिलो चरणमा सानेपा बागमती युथ क्लबसँग तथा सामाजिक युथ पुल्चोक स्पोर्ट्स क्लबसँग पराजित भएको थियो ।
यस्तै बिहीबारै भएको पहिलो खेलमा खालीबारी युथ फुटबल क्लब र महाविर स्टडिङ एण्ड एथ्लेटिक एसोसिएसनले गोलरहित बराबरी खेलेका थिए । महाविरको यो लगातार दोस्रो बराबरी हो भने खालीबारीले पहिलो अंक जोडेको छ ।
महाविरले पहिलो खेलमा रानीवन स्पोर्ट्स क्लबसँग बराबरी खेलेको थियो भने खालीबारी उद्घाटन खेलमा आरसी ३२ फुटबल एकेडेमीसँग पराजित भएको थियो ।
