१७ चैत, काठमाडौं । भारतमा जारी इन्डियन प्रिमियर लिग (आईपीएल) क्रिकेटमा आज दुई खेल हुँदै छन् । आज दिउँसो र बेलुका गरी दुई खेल हुनेछन् ।
पहिलो खेलमा दिउँसो दिल्ली क्यापिटल्स र सनराइजर्स हैदराबाद खेल्ने छन् । खेल दिउँसो पौने ४ बजेदेखि फेरोज शाह कोटला मैदानमा सुरु हुनेछ ।
दिल्लीको कप्तानी अक्षर पटेल तथा हैदराबादको कप्तानी अस्ट्रेलियन प्याट कमिन्सले गर्ने छन् । दिल्ली लगातार दोस्रो जित निकाल्ने खोजीमा हुनेछ भने हैदराबाद पहिलो जितपछि बेहोरेको हारबाट बाउन्स ब्याक गर्ने लक्ष्यमा हुनेछ ।
पहिलो खेलमा दिल्लीले लखनउ सुपर जायन्ट्समाथि शानदार जित हासिल गरेको थियो । त्यस्तै हैदराबादले पहिलो खेलमा राजस्थान रोयल्सलाई हराउँदा दोस्रो खेलमा लखनउ सुपर जायन्ट्ससँग पराजित भएको थियो ।
आजै बेलुका हुने दोस्रो खेलमा राजस्थान रोयल्स र चेन्नई सुपर किङ्सबीच प्रतिस्पर्धा हुनेछ । उक्त खेल गुवाहाटीस्थित बरसापारा स्टेडियममा पौने ८ बजेदेखि सुरु हुनेछ ।
राजस्थान लगातार दुई खेलमा पराजित भएको छ भने चेन्नईले पहिलो खेल जित्दा दोस्रोमा पराजित भएको थियो । राजस्थानले हैदराबाद र कोलकातासँग हार बेहोरेको थियो भने चेन्नईले मुम्बईलाई हराउँदा बेंगलुरुसँग पराजित भएको थियो ।
अंकतालिकामा बेंगलुरु २ खेलमा ४ अंकसहित शीर्षस्थानमा छ भने समान २ खेलमा २ अंकसहित लखनउ र गुजरात क्रमश: दोस्रो र तेस्रो स्थानमा छन् । पञ्जाब र दिल्ली समान १ खेलमा २ अंकसहित चौथो र पाँचौं स्थानमा छन् ।
२ खेलमा २ अंक जोडेका हैदराबाद, कोलकाता र चेन्नई क्रमश: छैटौं, सातौं र आठौं स्थानमा छन् । २ खेलमा अंकविहीन रहेका मुम्बई र राजस्थान नवौं र दशौं स्थानमा छन् ।
