– राधेश्याम साह
रौतहट/नेपाल पत्रकार महासंघ जिल्ला शाखा रौतहटले रिपोर्टिङका क्रममा मृत्यु भएका एभिन्युज टेलिभिजनका पत्रकार सुरेश रजकप्रति श्रद्धाञ्जली अर्पण गर्दै शोक सभा सम्पन्न गरेको छ।
शनिबार बिहान गौर नगरपालिकास्थित घण्टाघर चोकमा आयोजित सभामा पत्रकार महासंघले घटनाको घोर भर्त्सना गर्दै दोषीमाथि निष्पक्ष छानबिन गरी कारबाही गर्न माग गरेको छ।
नेपाल पत्रकार महासंघ मधेस प्रदेश पार्षद शैलेन्द्र झाले घटनालाई निन्दनीय भन्दै सञ्चारमाध्यम कार्यालयमा भएको आक्रमणप्रति आपत्ति जनाए। “रिपोर्टिङका क्रममा रहेका पत्रकारमाथि यस्तो घटना हुनु दु:खद छ। यो प्रेस स्वतन्त्रतामाथिको हमला हो,” उनले भने।
शोकसभामा महासंघ रौतहटका सचिव गौतम श्रेष्ठ, सहसचिव सञ्जय सहनी, पूर्व अध्यक्ष रविन्द्र प्रसाद साहलगायतले पत्रकारहरू असुरक्षित भइरहेको गुनासो राख्दै सरकारले सञ्चारकर्मीको सुरक्षामा ध्यान दिनुपर्ने आवश्यकता औंल्याए।
शुक्रबार आगजनी भएको भवनको समाचार संकलन गर्ने क्रममा जलेर मृत्यु भएका पत्रकार सुरेश रजकप्रति श्रद्धाञ्जली व्यक्त गर्दै वक्ताहरूले घटनालाई गम्भीर दण्डहीनताको संकेतका रूपमा लिएका छन्।
नेपाल पत्रकार महासंघसँगै श्रमजीवी पत्रकार संघ रौतहट तथा विभिन्न सञ्चार सम्बद्ध संस्थाहरूले घटनाको विरोध गर्दै दोषीलाई कारबाही गर्न, स्वतन्त्र प्रेसको सम्मान सुनिश्चित गर्न र सञ्चारकर्मीलाई निर्वाधरूपमा काम गर्न दिन आग्रह गरेका छन्।
