१६ चैत, काठमाडौं । एलोन मस्कले आफ्नो स्वामित्वमा रहेको सामाजिक सञ्जाल ‘एक्स’ आफ्नै एआई कम्पनी एक्सएआईलाई बिक्री गरेका छन् ।
अन्तर्राष्ट्रिय सञ्चार माध्यमका अनुसार उनले ३३ अर्ब अमेरिकी डलर बराबरको मूल्यमा एक्स कम्पनी आफ्नै अर्को कम्पनी एक्सएआईलाई बेचेका हुन् ।
मस्कका अनुसार, यो सम्झौताले एक्सएआईको विशेष क्षमता र एक्सको प्रयोगकर्ता एक ठाउँमा ल्याएर नयाँ सम्भावनाको खोजी गरिनेछ ।
हाल एक्सएआईलाई बिक्री गरिएको एक्सलाई मस्कले २०२२ मा ४४ अर्ब डलरमा खरिद गरेका थिए । त्यसयता उनले कम्पनीमा व्यापक परिवर्तन गरे । जसमा कर्मचारी कटौती, नीति पुनःनिर्माण र ब्रान्ड पुनःस्थापना समावेश छन् ।
एक्सएआईले पहिले नै एक्सका प्रयोगकर्ताका पोस्टहरू प्रयोग गरेर आफ्नो एआई मोडेल प्ररीक्षण गरिरहेको थियो।
एक्सले केही प्रयोगकर्ताहरूलाई एक्सआई द्वारा विकसित च्याटबट ग्रोक प्रयोग गर्ने सुविधा प्रदान गरिरहेको छ ।
मस्कका अनुसार, यस सम्झौताले प्रयोगकर्तालाई अझ प्रविधिमैत्री बन्न सहयोग गर्नेछ । निकट भविष्यमा एक्समा एक्सएआई प्रविधि अझ बढी समावेश हुनसक्ने उनको भनाइ छ ।
प्रविधिविद्हरुले भने मस्कको यो कदमलाई सामाजिक सञ्जाल र एआईको संयोजन गर्ने दीर्घकालीन रणनीति भएको बताएका छन् ।
