राधेश्याम साह
फागुन ७, रौतहट
रौतहटको सदरमुकाम गौरमा १२औं जिल्ला स्तरीय महिला साइकल दौड प्रतियोगिता भव्य रूपमा सम्पन्न भएको छ। प्रजातन्त्र दिवसको अवसरमा राजदेवी मिडिया सेन्टर, गौर रौतहट द्वारा आयोजित प्रतियोगितामा जिल्लाका १८ वटै पालिकाका १३ देखि १५ वर्ष उमेर समूहका १५ जना महिला खेलाडीहरू फाइनल प्रतिस्पर्धामा सहभागी भएका थिए।
सभामुख मण्डलद्वारा उद्घाटन
प्रतियोगिताको उद्घाटन मधेस प्रदेशका सभामुख रामचन्द्र मण्डलले गौरको बीपी चौकमा रिबन काटेर गर्नुभएको थियो। उद्घाटन समारोहमा सभामुख मण्डलले महिला खेलकुद क्षेत्रमा बढ्दो सक्रियता प्रशंसनीय रहेको उल्लेख गर्दै, यस्ता प्रतियोगिताले महिलाहरूलाई आत्मनिर्भर र आत्मविश्वासी बनाउन मद्दत गर्ने बताए। साथै, आयोजक तथा सहयोगी संस्थाहरूलाई धन्यवाद ज्ञापन गरे।
उत्कृष्ट खेलाडीहरू सम्मानित
प्रतियोगितामा सहभागी १५ जना खेलाडीहरूलाई सम्मानपत्रसहित साइकल पुरस्कार प्रदान गरिएको राजदेवी मिडिया सेन्टरका संयोजक रामपुकार राउतले जानकारी दिए।
विजेता सूची:
३. प्रथम स्थान – रानी कुमारी यादव (राजदेवी नगरपालिका) – गियर साइकल र नगद ५० हजार रुपैयाँ
२. द्वितीय स्थान – सन्जनी कुमारी यादव – लेडिज साइकल र नगद ३० हजार रुपैयाँ
३. तृतीय स्थान – रबिना साह – सानो साइकल र नगद २० हजार रुपैयाँ
साथै, अन्य सहभागी खेलाडीहरूलाई पनि सम्मानपत्र र प्रोत्साहन पुरस्कार प्रदान गरिएको थियो।
महिला खेलकुद प्रवर्द्धनमा प्रतियोगिताको योगदान
प्रतियोगिताको आयोजनाबाट महिला खेलकुद प्रवर्द्धन हुनुका साथै महिलाहरूको प्रतिभा उजागर गर्ने अवसर प्राप्त भएको आयोजक संस्थाका अध्यक्ष रामपुकार पटेलले बताए। उनका अनुसार, यस वर्ष पहिलो चरणको खेलमा जिल्लाभरका १०५ जना महिला प्रतिस्पर्धी सहभागी भएका थिए। हरेक वर्ष आयोजना हुँदै आएको यस प्रतियोगिताले महिला खेलकुदमा चासो, उत्साह, र लोकप्रियता बढाएको आयोजकको भनाइ छ।
प्रतियोगितामा विशिष्ट व्यक्तित्वहरूको उपस्थिति प्रतियोगितामा प्रमुख अतिथि मधेस प्रदेशका सभामुख रामचन्द्र मण्डलसहित, मधेस प्रदेश सभा सदस्य नागेन्द्र साह, नेपाल पत्रकार महासंघ रौतहटका पूर्व अध्यक्ष रविन्द्र प्रसाद साह र प्रेमचन्द्र झा, पत्रकार सन्तोष पौडेल, राकेश यादव, कृष्ण तिवारी, युवा नेता ओमप्रकाश साह मधेसिया, बुद्धिजीवी वर्ग तथा राजनीतिक व्यक्तित्वहरूलगायतको उपस्थितिमा प्रतियोगिता सम्पन्न भएको थियो।
आयोजक संस्थाको प्रतिबद्धता
आयोजक संस्थाले आगामी वर्षहरूमा पनि महिला खेलकुद प्रवर्द्धनका लागि यस्ता प्रतियोगिता निरन्तर सञ्चालन गर्ने प्रतिबद्धता जनाएको छ।
