काठमाडौं । टेलिभिजन रियालिटी शो ‘हिमालय रोडिज सिजन ६’ का विजेता जोसेफ शर्माले आफूलाई अफर आए फिल्म खेल्ने भएका छन् । अनलाइनखबरसँग कुरा गर्दै २८ वर्षिय विजेताले फिल्म खेल्न तयार रहेको बताए ।
उनले भने, ‘अहिलेसम्म अभिनयतिर सोचेको त छैन । सायद अहिलेसम्म फिल्मको अफर आएको पनि छैन । यदि फिल्मको अफर आयो भए किन नगर्ने ? गर्ने हो नि ।’ उनले अघि भने, ‘जीवनमा आफूलाई जुन कुराको अफर आउँछ, त्यो कुरा समयमा नै लिन जान्नुपर्छ । जसले गर्दा मैले पाएको कुरा सबै गर्ने कोसिस गर्छु ।’
रोडिजको पुरस्कार वितरण गर्न आयोजित समारोहमा पनि शर्मालाई निर्देशक सिमोस सुनुवारले फिल्म खेल्न योग्य रहेको बताएका थिए । ‘उनको जिउडाल र सबै ठीक छ । ह्यान्डसम छन्’ प्रियंका कार्की र दीया मास्केको छेउमा सिमोसले भने । के तपाईंले जोसेफलाई डेब्यु गराउन लाग्नुभएको हो भन्ने प्रश्नमा उनले भविष्यमा हुनसक्ने बताए ।
रोडिज विजेता भएबापत शर्माले १० लाख नगद र यामाहको एउटा मोटरसाइकल पुरस्कार पाएका थिए । प्राप्त पुरस्कारलाई के गर्र्ने सोच गराउनु भएको छ भन्ने प्रश्नमा जोसेफ भन्छन्– ‘आफूलाई पहिलेबाट नै खेलकुदमा रुचि भएको हुनाले आगामी दिनमा उक्त पुरस्कारको पैसालाई खेलकुदमा लगानी गर्ने छु ।’
रोडिज आउनु पहिले जोसेफ भारतीय प्रहरीमा कार्यरत थिए । रोडिजले आफ्नो आत्मविश्वासलाई वृद्धि गराएको उनले बताएका छन् ।
