१५ पुस, काठमाडौं । गत ११ कात्तिकको दिउँसो काठमाडौंको लाजिम्पाटस्थित इनोभा अस्पतालको पार्किङमा घरजग्गा व्यवसायी विक्रम लामामाथि सांघातिक आक्रमण भयो । नुवाकोटको ककनी गाउँपालिका– ६ घर भएका ३५ वर्षीय विक्रममाथि मार्ने उद्देश्यसहित अन्धाधुन्ध रड आक्रमण भएको थियो ।
आक्रमण भएकै दिन जिल्ला प्रहरी परिसर काठमाडौंको टोलीले घटनामा संलग्न रहेको आशंकामा मार्शल भनिने शैलेन्द्र तामाङलाई पक्राउ गरेर अनुसन्धान अगाडि बढायो । अनुसन्धान अगाडि बढ्दै जाँदा खुल्यो, नेपालभूमि रियल स्टेटका प्रबन्धक निर्देशकसमेत रहेका विक्रममाथि आक्रमण भाउजु नाता पर्ने व्यावसायिक साझेदार लक्ष्मी राईले गराएकी रहिछन् । उनी बेलायत बस्दै आएकी छन् । आक्रमणको मुख्य योजना भने अपराधिक पृष्ठभूमिका अजय लामाको रहेछ ।
त्यति मात्र होइन, यी दुईलाई मिलाउन गण्डकी प्रदेश सरकारका पूर्वमन्त्री दीपक मनाङे (राजिवविक्रम गुरुङ)का स्वकीयसचिव टीका भण्डारीको भूमिका रहेछ । एक वर्षअघि गुरुङ मन्त्री रहेकै समयमा स्वकीयसचिव भण्डारीले आक्रमणको योजनामा भूमिका निर्वाह गरेको प्रहरी अनुसन्धानमा खुलेको छ । भण्डारीले लक्ष्मी र अजयको बीचमा रहेर काम गरेको प्रहरी अधिकारी बताउँछन् ।
घटनामा संलग्नता देखिएका भण्डारी पक्राउ परिसकेका छन् । गत शुक्रबार उनलाई पक्राउ गरेर ज्यान मार्ने उद्योग र संगठित अपराधको कसुरमा म्याद लिएर अनुसन्धान अघि बढाइएको जिल्ला प्रहरी परिसर काठमाडौंका एसपी तथा प्रवक्ता नवराज अधिकारीले जानकारी दिए ।
एक वर्षअघि लामामाथि आक्रमण गर्ने तथा लागुऔषधमा फसाउने योजनामा पनि भण्डारी जोडिएको खुलेको परिसरका एक अनुसन्धान अधिकृत बताउँछन् । ‘एक वर्षअघिको योजनामा पनि भण्डारी जोडिएको देखिन्छ । अहिलेको आक्रमणमा पनि उनको भूमिका देखिन्छ,’ ती अनुसन्धान अधिकृतले अनलाइनखबरसँग भने ।
आक्रमणपछि उनीहरू गोरखा, झापा, इलाम र सुनसरीमा लुकेर बसेको तथ्य प्रहरीले पत्ता लगाएको थियो । प्रहरीले ती स्थान ‘लोकेट’ गरेपछि उनीहरु भने फरार भए ।
आक्रमणमा भूमिका देखिएपछि केही समयअघि काठमाडौं उपत्यका अपराध अनुसन्धान कार्यालयको टोलीले भण्डारीलाई बोलाएर केरकार गरेर छाडेको थियो । तर, त्यसको केही दिनमै परिसरले उनलाई नियन्त्रणमा लिएर अनुसन्धान अघि बढाएको हो । प्रहरी हिरासतमा रहेका भण्डारीले भने आरोप खण्डन गरेका छन् । आक्रमणमा मुछिएकाहरूसँगको सम्बन्ध रहेकै भरमा आफूलाई दोष लगाउन नहुने भण्डारीको भनाइ रहेकोे एक अनुसन्धान अधिकृत बताउँछन् ।
प्रहरीले अनुसन्धानको क्रममा अहिलेसम्म तीनजनालाई पक्राउ गरिसकेको छ । आक्रमण भएकै दिन मार्शल भनिने शैलेन्द्र तामाङ पक्राउ परेका थिए । उनीमाथि सुरुमा प्रहरी अभद्र व्यवहारको कसुरमा मुद्दा चलाएको थियो । उनी यसअघि पनि फौजदारी मुद्दा चलेकाले ‘पटके’ कसुरमा मुद्दा जिल्ला अदालत काठमाडौंले हेरेको थियो । अदालतले उनीविरुद्ध २८ दिनको कैद सजाय सुनाएको थियो । प्रहरी हिरासतमा १८ दिन बिताइसकेकाले उनी थप १० दिन कारागार बसेर छुटे । लगत्तै प्रहरीले पुनः पक्राउ गरेर ज्यान मार्ने उद्योगको कसुरमा अनुसन्धान अघि बढाएको छ । उनी अहिले परिसर काठमाडौकै हिरासतमा छन् ।
२ मंसिरमा काठमाडौं उपत्यका अपराध अनुसन्धान कार्यालयको टोली सोही घटनामा संलग्न रही फरार रहेका निश्चल सुनारलाई झापाबाट पक्राउ गर्यो । गत शुक्रबार भण्डारीलाई बालाजुनजिकबाट पक्राउ गरेसँगै आक्रमणको घटनामा पक्राउ पर्नेको संख्या तीन पुगेको छ ।
आक्रमणका मुख्य योजनाकार भनिएका अजय लामा र उनका सहयोगी दीपक बरामू फरार छन् । आक्रमणपछि उनीहरू गोरखा, झापा, इलाम र सुनसरीमा लुकेर बसेको तथ्य प्रहरीले पत्ता लगाएको थियो । प्रहरीले ती स्थान ‘लोकेट’ गरेपछि उनीहरु भने फरार भए । उनीहरू अहिले भारत पुगेको अनुसन्धान अधिकृतहरू बताउँछन् ।
आफन्तमार्फत अजयले झापाबाट पाँच लाख रुपैयाँ मगाएर बुझेको पनि प्रहरीले पत्ता लगाएको थियो । तर, घटना भएको दुई महिना बित्दासम्म उनीहरू पक्राउ पर्न सकेका छैनन् ।
बेलायत बस्ने लक्ष्मी मुख्य योजनाकार
प्रहरीका अनुसार लामामाथिको आक्रमणको घटनामा बेलायत बस्दै आएकी लक्ष्मी राई मुख्य योजनाकार देखिएकी छन् । उनीविरुद्ध पनि काठमाडौं जिल्ला अदालतबाट पक्राउ पुर्जी जारी भएको परिसर काठमाडौं स्रोतले बतायो ।
घटनालगत्तै विक्रमले लक्ष्मीले नै सुपारी दिएर आफूमाथि आक्रमण गर्न लगाएको भन्दै प्रहरीलाई बताएका थिए । अनुसन्धानको क्रममा पनि कनेक्सन देखिएपछि प्रहरीले लक्ष्मीविरुद्ध पनि पक्राउ पुर्जी जारी गरेको स्रोतको भनाइ छ ।
विक्रमको भाउजु नाता पर्छिन् । उनका दाजुसँगको सम्बन्ध विक्रमकै कारण दरार आएको भन्दै लक्ष्मीले आक्रमणको योजना बनाएको अनुसन्धानमा खुलेको प्रहरी अधिकारी बताउँछन् ।
नाता मात्र होइन, लक्ष्मी र विक्रम कुनै समयका व्यावसायिक साझेदार पनि हुन् । एक क्रसर व्यवसायमा यी दुईको संयुक्त लगानी थियो । पछिल्लो समय भने सम्बन्धमा दरार आएपछि मार्नेसम्मको योजना बनाएर आक्रमण गरिएको दाबी पीडित विक्रम लामाको रहेको छ ।
यसअघि नै पनि आफूमाथि आक्रमणको योजना बनाइएको सूचना आफूले पाएको भन्दै विक्रम प्रहरीको केन्द्रीय अनुसन्धान ब्युरो (सीआईबी)मा पुगेका थिए ।
आक्रमणको योजना बनाएपछि आक्रमणकारीले चारवटा नयाँ मोबाइल सेट र सिमकार्ड किनेका थिए । आक्रमणपछि ती मोवाइल फोन र सिमकार्डसमेत प्रयोग भएका छैनन् ।
आपराधिक समूह परिचालन गरेर आक्रमण
नेपालभूमि रियल स्टेटका प्रबन्धक निर्देशक विक्रममाथि आक्रमण गर्न लक्ष्मीले आपराधिक समूह परिचालन गरेको खुलेको छ । प्रहरी हिरासतमा रहेका मार्शल यसअघि पनि पक्राउ परेर ज्यान मार्ने उद्योगको कसुरमा मुद्दा चलेका व्यक्ति हुन् ।
उनीसहितको समूहले ठमेलको छायाँ सेन्टरस्थित प्लेब्वाई क्लबको पार्किङमा ६ माघ २०८० मा अर्का एक व्यक्तिमाथि आक्रमण गरेको थियो । त्यसवेला नुवाकोटकै गुण्डानाइके सानुभाइ भनिने युवराज गुरुङको समूहमा रहेका तामाङसहित सातजनाविरुद्ध ज्यान मार्ने उद्योगमा मुद्दा चलेको थियो ।
प्रहरी इन्काउन्टरमा मारिएका गुण्डानाइके कुमार ‘घैटे’कै सहयोगी सानुभाइले पछिल्लो समय आफ्नो छुट्टै समूह बनाएर गुण्डागर्दी गर्दै आएको प्रहरी अधिकारीहरू बताउँछन् । उनै सानुभाइको समूहमा रहेका तामाङ व्यवसायी विक्रम लामामाथि आक्रमण गर्न प्रयोग भएको खुलेको हो ।
अर्का फरार आरोपित अजय लामा पनि यसअघि ठगी मुद्दामा तीन वर्ष ६ महिना जेल बसेर छुटेका व्यक्ति हुन् । उनीविरुद्ध गत ९ पुसमा ठमेलको सात घुम्तीस्थित १० एक्स क्लबको अगाडि ड्युटीमा रहेका प्रहरी जवान लोकबहादुर बुढामाथि कुटपिट गरेको अभियोगमा मुद्दा चलेको थियो ।
त्यतिबेला लामाको समूहले प्रहरी जवान बुढाको टाउकोमा किक हान्नुका साथै मोबाइलसमेत फुटाइदिएको थियो । उनै अजयले आफूसहित तीनजना प्रयोग गरेर विक्रममाथि आक्रमण गरेको देखिएको परिसरका एसपी अधिकारी बताउँछन् ।
प्रहरी स्रोतका अनुसार आक्रमणको योजना बनाएपछि आक्रमणकारीले चारवटा नयाँ मोबाइल सेट र सिमकार्ड किनेका थिए । आक्रमणपछि ती मोवाइल फोन र सिमकार्डसमेत प्रयोग भएका छैनन् ।
विक्रममाथिको आक्रमण सफल भएपछि सिमकार्डसहितका चारवटै मोबाइल अजयले लगेका थिए । आक्रमण गर्ने योजना बनाएपछि अजयले कफी खान भन्दै विक्रमलाई बोलाएको र त्यसैबेला अरु तीनजनाले विक्रमसँग भेटेका थिए । त्यसको केही दिनमै उनीमाथि आक्रमण भएको थियो ।
