पुस १४, काठमाडौं । मदन भण्डारी स्पोर्टस एकेडेमीको १६औं स्थापना दिवसका अवसरमा यही पुस १७ देखि २४ गतेसम्म बुटवलमा हुने मदन भण्डारी गोल्डकप ईन्डो-नेपाल रनिङ शिल्ड पुरुष भलिबल च्याम्पियनसीप २०८१ को तयारी पूरा भएको छ ।
उक्त प्रतियोगिताको उद्घाटन प्रधानमन्त्री केपी शर्मा ओलीले गर्ने आयोजक मदन भण्डारी स्पोर्ट्स एकेडेमीले जनाएको छ । प्रतियोगितामा नेपाल र भारतबाट गरी ८ वटा टिमले प्रतिष्पर्धा गर्दैछन् ।
त्रिभुवन आर्मी क्लब, नेपाल पुलिस क्लब, एपीएएफ क्लब, मणिमुकुन्द भलिबल क्लब, गलकोट भलिबल क्लब, रुकुम पश्चिम भलिबल प्रशिक्षण केन्द्र, भारतको गुजरात स्टेट भलिबल एशोसिएसन र आयोजक मदन भण्डारी स्पोर्ट्स एकेडेमीको टिमले प्रतिस्पर्धा गर्ने छन् ।
एकेडेमीका अध्यक्ष ध्रुव आचार्यका अनुसार प्रतियोगिताको खेलहरू बुटवलस्थित रामनगर खेल मैदानमा खेलाइनेछ ।
प्रतियोगिताको विजेताले नगद ७ लाख तथा उपविजेताले ३ लाख ५० हजार, तेस्रोले १ लाख ७५ हजार तथा चौथो हुनेले सान्त्वना पुरस्कार १ लाख रूपैयाँ प्राप्त गर्नेछन् ।
उत्कृष्ट खेलाडीलाई २५ हजार तथा विभिन्न विधामा आकर्षक पुरस्कार रहनेछन् । पुस १६ गते बुटवलमा प्रतियोगिताको ट्रफी सार्वजनिक गरिने आयोजनकले जनाएको छ ।
