काठमाडाैँ/मुस्लिम आयोगले मधेसी आयोगलाई मुस्लिमलाई पुन: मधेसीकै रूपमा राख्न अनुराेध गरेकाे छ।
मुस्लिम आयोगले मधेसी आयोगलाई एक पत्र पठाउँदै यस्ताे अनुराेध गरेकाे हाे।
मधेसी सूचीबाट हटाएपछि मुस्लिमहरूले मधेसीको सिफारिस पाउन अवरोध देखिएको हुनाले सो अवरोधलाई हटाइदिन मुस्लिम आयाेगले अनुराेध गरेकाे हाे।
मधेसी आयोगद्वारा प्रकाशित ‘मधेसी समुदायको थर सूचीकरण अध्ययन प्रतिवेदन २०७८’ मा १४९ जातसहित थारु र मुस्लिमलाई पनि मधेसीको रूपमा सूचीकृत गरिएको थियो।
प्रतिवेदन राष्ट्रपतिसमक्ष पेश भएपछि मुस्लिम र थारु आयोगका पदाधिकारीहरूसहित सो समुदायका विभिन्न संघ-संगठनहरूले मधेसी आयोगको सो निर्णयप्रति व्यापक विरोध गरेपछि आयोगले मङ्सिर २० गते बैठक बसी थारु र मुस्लिमलाई मधेसीको सूचीबाट हटाएको थियो।
मधेसीको सूचीबाट मुस्लिमलाई हटाएपछि अहिले लोकसेवालगायत विभिन्न निकायहरूमा प्रतिस्पर्धा गर्न मुस्लिम समुदायलाई सम्बन्धित निकायबाट मधेसीको सिफारिस पाउन अवरोध देखिएको कुरा मुस्लिम आयोगको पत्रमा उल्लेख गरिएको छ।
मधेसी आयोगले सुरुवातमा सबैलाई समेटेर नै आयोग अगाडि बढ्न खोज्दा सोही समुदाय र सम्बन्धित समुदायका आयोगका पदाधिकारीज्यूहरूबाट व्यापक विरोध भएपछि आयोग बाध्य भएर थारु र मुस्लिमलाई मधेसीको सूचीबाट हटाएको मधेसी आयोगका अध्यक्ष डा.विजयकुमार दत्तले जानकारी दिए।
