वीरगंज/ बाराको जितपुर सिमरा उपमहानगरपालिका–२३ भलुही टोलमा रहेको एरोटेक प्रा.लिमा चोरी गरेर भाग्दै गरेका दुई जनालाई प्रहरीले नियन्त्रणमा लिएको छ।
उद्योगमा शनिबार राति १०/१२ जना हतियारसहित प्रवेश गरी स्टोरमा राखिएको सिलिण्डर बनाउन प्रयोग हुने पित्तलको भल्भ, जिंक बायर, बुस बनाउने डण्डी तथा मजदुरहरुको साथमा रहेको नगद तथा मोबाइलसमेत लुटेर भाग्दै गरेको अवस्थामा प्रहरी र उनीहरुबीच गोली हानाहान भएको छ।
उनीहरुलाई पक्राउ गर्ने क्रममा प्रहरीलाई लक्षित गरी एक राउन्ड गोली चलाएपछि प्रतिरक्षाको लागि प्रहरीले तीन राउन्ड गोली चलाएको बारा प्रहरीले जनाएको छ।
उनीहरुमध्ये दुई जनालाई कटुवा बन्दुक, त्यसको दुई राउण्ड गोली र एक थान भरुवा बन्दुकसहित पक्राउ गरिएको प्रहरीले जनाएको छ।
पक्राउ पर्नेमा जितपुर सिमरा उपमहानगरपालिका–९ का जयराम पासवान र वडा नम्बर १० का जवाहिर महतो रहेका छन्। पक्राउ गर्ने क्रममा उनीहरुले रड प्रहार गर्दा इलाका प्रहरी कार्यालय जितपुरका प्रहरी वरिष्ठ नायब निरीक्षक कमलबहादुर शाहीको टाउकोमा चोट लागेको जिल्ला प्रहरी कार्यालय बाराका प्रहरी निरीक्षक रामकाजी थापाले जानकारी दिए।
उनलाई उपचारको लागि वीरगंज हेल्थ केयर अस्पतालमा भर्ना गरिएको छ। पक्राउ परेकाहरुलाई डाँका, हात हतियार, खरखाजाना तथा ज्यान मार्ने उद्योग मुद्दामा थप अनुसन्धान भइरहेको थापाले बताए। फरार भएका अरुको खोजी भइरहेको उनले जानकारी दिए।
