चन्द्रसूर्य समाचारदाता/
वीरगंज, १९ चैत्र/ सशस्त्र प्रहरीले प्रतिबन्धित लागुऔषधसहित पक्राउ गरेको दुई युवक सशस्त्र प्रहरीको नियन्त्रणबाट भाग्न सफल भएको छ ।
सशस्त्र प्रहरी बल नेपाल नं.२ छिन्नमस्ता बाहिनी मुख्यालयबाट खटेको स्क्वायड टोली र सशस्त्र प्रहरी नायब निरीक्षक प्रदीप कुमार चौधरीको कमाण्डमा खटेको सशस्त्र प्रहरी टोलीले सिरहाको लहान नपा-२३ लहान-ठाँडी सड़क खण्डको बताना तिलवना चौकबाट तीन सय एम्प्युल प्रतिबन्धित लागुऔषध नर्फ़ीन, दुई सय५१ एम्प्युल प्रोमेथ्रोजाइन हाइड्रो क्लोराइड इंजेक्शन, डाइजोपाम दुई सय ९८ एम्प्युलसहित दुई युवकलाई शनिवार राती १०:१५ मा नियन्त्रणमा लिएको थियो ।
उल्लेखित सशस्त्र प्रहरी टोलीले सो सड़कखण्डमा चेक पोइन्ट थापी चेक जाँच गर्ने क्रममा ठाँड़ीबाट लहान तर्फ जाँदै गरेको BR32 AD 2617 नम्बरको भारतीय मोटरसाइकलसहित दुई जनालाई नियन्त्रणमा लिई नेपाल प्रहरीलाई बुझाउने प्रकिया गर्दै गर्दा सशस्त्र प्रहरीको चंगुलबाट मोटरसाइकिल सहित फुत्किन सफल भएका छन् ।
झन्डै एक दर्जन हतियारधारी सशस्त्र प्रहरी बलको नियन्त्रणबाट मोटरसाइकलसहित दुई दुई जना लागू औषध कारोबारी फरार हुनु आफैंमा शंकाको विषय बनेको छ ।
