२७ साउन, काठमाडौं । नेपालको धितोपत्र बजारमा सूचीकृत सम्पूर्ण सेयरको कुल मूल्यमा नयाँ रेकर्ड बनेको छ ।
नेपाल स्टक एक्स्चेन्जका अनुसार बजारमा लगानीकर्ताको कुल सेयर मूल्य (सूचीकृत सबै सेयरको कुल मूल्य) ४५ खर्ब ४१ अर्ब पुगेको छ । यसअघि २०७८ भदौ २ गते बजारको आकार कुल ४४ खर्ब ६८ अर्ब रुपैयाँको थियो ।
जुन दिन बजारको परिसूचक नेप्से ३१९८ अंकको उच्चतम रेकर्ड बनाएको थियो । नेप्से परिसूचकको रेकर्ड तोडिन नपाउँदै सूचीकृत धितोपत्रको सम्पत्ति मूल्य भने अहिलेसम्मकै उच्च भएको हो ।
थप कम्पनीको सेयर सूचीकृत हुनु र समग्रमा ती सेयरको मूल्य बढ्दै जाँदा बजारको सम्पत्ति मूल्य (आकार) अहिलेसम्मकै उच्च भएको नेप्सेका प्रवक्ता मुराहरि पराजुलीले बताए ।
‘थप कम्पनीहरुको सेयर सूचीकृत हुनु र तीसहित अन्य सेयरको पनि मूल्य बढ्दा पूँजीकरण रकमले नयाँ रेकर्ड बनाएको हो’ उनले भने ।
३० माघ २०५० देखि सबै कम्पनीको पूँजीकृत रकमलाई १ सय आधार मानेर नेप्से गणना सुरु भएको हो । त्यसैले पूँजीकृत रकम घटबढ भएकै आधारमा नेप्से घटबढ हुन्छ ।
कुनै दिन अधिकांश कम्पनीको सेयर मूल्य बढ्दा पनि नेप्से घटेको हुन्छ भने कुनै दिन अधिकांश कम्पनीको मूल्य घट्दा पनि नेप्से बढेको हुन्छ । तर कुल पूँजीकृत रकम बढ्दा नेप्से घट्ने हुँदैन ।
सेयर बजारको आकारका साथै आइतबार कारोबार रकममा पनि नयाँ रेकर्ड बनेको छ । यस दिन २५ अर्ब ७७ करोड ९४ लाख रुपैयाँ बराबरको कारोबार भएको छ ।
