१६ पुस, काठमाडौं । ललित स्मृति एन्फा यू-१८ युथ लिगको च्याम्पियन नेपाल पुलिस क्लब अन्तिम खेलमा पराजित भएको छ ।
मंगलबार सातदोबाटोस्थित एन्फा कम्प्लेक्समा भएको खेलमा पुलिसलाई एनआरटीले २-१ ले पराजित गरेको हो । पुलिसलाई हराएपछि एनआरटी लिगमा उपविजेता बन्यो ।
डबल राउण्ड रोविनको आधारमा भएको लिगमा पुलिसले २२ खेलबाट ४८ अंक जोडेर च्याम्पियन बन्दा एनआरटीले समान खेलबाट ४७ अंक जोड्यो । यसअघि नै उपाधि होडबाट बाहिरिसकेपनि एनआरटीले जितपछि उपविजेता बनेको हो ।
च्याम्पियन पुलिसले ट्रफीसहित नगद १ लाखर उपविजेता एनआरटीले नगद ५० हजार प्राप्त गर्यो ।
कप्तान सुवास बमले खेलको नवौं मिनेटमा गोल गर्दै पुलिसलाई सुरुमै अग्रता दिलाएका थिए । तर पुलिसले त्यो अग्रता जोगाउन सकेन । पहिलो हाफको इन्जुरी टाइममा पुकार गोलेले एनआरटीका लागि बराबरी गोल फर्काए । ५४औं मिनेटमा अर्जित तामाङले गोल गर्दै एनआरटीलाई २-१ को अग्रता दिलाए । त्यही गोल नै एनआरटीको जितमा निर्णायक बन्यो ।
मंगलबारै भएको खेलमा संकटा क्लबले एपीएफलाई ३–१ ले पराजित गर्यो ।
च्याम्पियन पुलिसका कप्तान सुबास बामले २४ गोलसहित सर्वाधिक गोलकर्ताको पुरस्कार पाए ।
संकटा क्लबका कृष्ण बहादुर आले मोस्ट भ्यालुएबल प्लेअर घोषित भए । यस्तै थ्री स्टार क्लबका आयुष्मान लो तामाङ बेस्ट गोलकिपर घोषित भए । व्यक्तिगत उत्कृष्टले जनही १५ हजार प्राप्त गरे ।
तस्बिर: एन्फा
