इरानबाट चीनको ग्वाङ्झाउका लागि उडेको इरानी कम्पनी महान एयरको जहाज डब्लू ५८१ मा बम रहेको जानकारी नयाँ दिल्लीस्थित एयर ट्राफिक कन्ट्रोलरलाई आयाे ।
सोमबार बिहान भारतीय समय अनुसार करिब ९ बजे ३४० प्यासेन्जर लिएर भारतीय एयर स्पेस प्रवेश गरेको इरानी कम्पनी साे जहाजमा बम रहेको स्वयम् पाइलटले ट्राफिक कन्ट्रोलरलाई जानकारी दिएका हुन् ।
भारतीय सञ्चार माध्यमहरुका अनुसार ट्राफिक कन्ट्रोलरलाई खबर पुगे लगत्तै इन्दिरा गान्धी विमानस्थलमा सतर्कता मात्र अपनाइएन, यसका साथै भारतीय सुरक्षा एजेन्सीहरूले समेत सकर्तता लिए । तर, जहाजलाई नयाँ दिल्ली विमानस्थलमा भने अवतरणको अनुमति दिइएन ।
नयाँ दिल्लीमै अवतरणको अनुमति मागेको यस विमानलाई अनुमति दिइएन । सुरक्षाकाे कारण देखाउँदै अनुमति नदिइएपछि जहाजलाई जयपुर वा चण्डीगढ विमानस्थलमा जान अनुमति दिइएको थियो ।
पाइलटले भने दुवै शहरमा जहाज अवतरण गराउन इन्कार गरे । यसकारण भारतीय वायुसेनाको दुई विमानले डब्लू ५८१ जहाजलाई आकासमै घेरे ।
सोहीकारण बिहान ९ बजेर २० मिनेट देखि १० बजेर ५ मिनेटसम्म जहाज दिल्लीको आकासमै घुमेको थियो ।
अन्तिममा पाइलटले जहाजलाई आफ्नो गन्तव्य चीनको ग्वाङ्झाउ नै लैजाने निर्णय लिए । जहाज गन्तब्यमा सुरक्षित अवतरण गरिसकेको समाचार एजेन्सी राेयटर्सले जनाएकाे छ ।
