काठमाडौं । टिभी रियालिटी शो ‘कमेडी च्याम्पियन’बाट उदाएका कलाकार हिमेश पन्त विहिबारदेखि प्रदर्शन हुने फिल्म ‘ज्वाइँ साब’को शीर्षमध्येको भूमिकामा छन् । डेब्यू फिल्म ‘वर एण्ड बधु’ पछि पन्तको यो दोस्रो फिल्म हो ।
यसबीच उनी राष्ट्रिय स्वतन्त्र पार्टीको तर्फबाट राजनीतिमा संलग्न भए । उक्त दलको तर्फबाट धादिङको प्रतिनिधि सभा चुनावका उम्मेदवार समेत बने । तर, चुनावको नतिजा उनको पक्षमा आएन ।
‘राजनीतिमै हुँदा मलाई फिल्मको अफर आएको हो । उहाँहरुले ‘तपाईं त राजनीतिमा हुनुहुन्छ, अब फिल्म गर्नुहुन्न कि के छ ? कमव्याक हुने कि नहुने ? भनेर सोध्नुभयो । मेरो चाहना कमेडीमा कमव्याक हुने नै थियो’ उनले भने ।
भन्छन्, ‘अहिले कमेडी दरबार गरिरहेको छु । यही क्रममा ‘ज्वाइँ साब’को कुरा आयो र फिल्ममा जोडिएँ ।’
‘ज्वाइँ साब’ आफ्नो लागि भिन्न फिल्म रहेको उनको बुझाई छ । ‘ज्वाइँ साबको स्क्रिप्ट पढ्दा हाँसेको हाँसेकै भएँ । फिल्मले राम्रै गर्ला जस्तो महसुस भएर यसमा जोडएँ । ज्वाइँ साबको जस्तो कथा मैले यसअघि सुनेको थिइनँ र कथा कमेडी क्रिएट गर्ने किसिमको छ । कमेडीमा फर्मुला हुन्छ । तर, यसमा अलिकति बढी केही निस्कियो भने त्यसले कमेडी क्रिएट गर्छ’, उनले भने ।
फिल्ममा उनको पात्रको नामक घने हो । ‘घनेसँगै जितु नेपाल दाई, बुद्धि तामाङको पारिवारिक पृष्ठभमि फरक हुन्छ । त्यो पात्र विदेश जाने सोच बनाउँछ, तर जाँदैन । उसको मिसन नै फरक हुन्छ । मैले मध्यम वर्गीय परिवारको अनेक समस्या भोगेको युवकको भूमिका निभएको छु’, हिमेश भन्छन् ।
ट्रेलरमा हिमेशले ज्वाइँ बन्नका लागि अन्य कलाकारसँगै प्रतिष्पर्धा गर्छन् । उनले ज्वाइँ बन्न निकै संघर्ष गर्नु परेको खुलाए । तर वास्तविकतामा भने त्यस्तो संघर्ष अहिलेसम्म गर्नु नपरेको उनको भनाई छ ।
‘म आफ्नो फिल्डमा केही न केही राम्रै गरिरहेको मान्छे हुनाले सजिलो पनि छ । प्रस्ताव पनि टन्नै आउँछ । म आफैं त्यसमा जान चाहन्नँ । काममा फोकस छु’, उनी भन्छन् ।
हिमेश कमेडीपछि एक्सन फिल्म गर्न चाहन्छन् । ‘कमेडीबाहेक मलाई एक्सन जनरामा सुट गर्छ जस्तो लाग्छ । मैले फिल्म ‘शमशेर’मा अनुहारको आधा भाग चलेको क्यारेक्टरमा अभिनय गर्न साइन गरेको थिएँ । तर फिल्म बनेन् । मेरो चासो एक्सनमा पनि छ’, उनी भन्छन् ।
हिमेशलाई फिल्ममा ‘हिरो’ अथवा ‘लिड क्यारेक्टर’ मा काम गर्ने इच्छा छ । ‘अहिले तुरुन्तै भन्ने छैन । कामको अनुभव लिएपछि भविष्यमा म आफूले बबालै गर्न सक्छु भन्ने लागे पछि मात्र हिरो अथवा लिड क्यारेक्टरमा काम गर्छु’, उनी भन्छन् ।
वसन्त निरौला निर्देशित फिल्म ‘ज्वाइँ साब’मा जितु नेपाल, नीति शाह, बुद्धि तामाङ, रमेश बुढाथोकी, प्रकाश घिमिरे, शिशिर वाङ्देल, दीपक आचार्यलगायतका कलाकारको अभिनय छ ।
