३१ भदौ, काठमाडौं । अमेरिकाले आईसीसी विश्वकप लिग–२ मा घरेलु टोली नामिबियामाथि ६ विकेटको जित हात पारेको छ । २ सय रनको लक्ष्य पछ्याएको अमेरिकाले ४१.३ ओभरमा ४ विकेट गुमाउँदै पूरा गरेको थियो ।
अमेरिकाको जितमा कप्तान मोनांक पटेलले ८२ बलमा ७ चौका र १ छक्कासहित सर्वाधिक ७२ रन बनाए । युवा ब्याटर साइतेजा मुककामल्ला ७४ बलमा ४ चौका र १ छक्कासहित ६४ रनमा नट आउट रहँदा सुशान्त मोदानीले ३६ रन बनाए ।
नामिबियाका जेराल्ड इरास्मसले २ र टांगेनी लुंगामेनीले १ विकेट लिए ।
त्यसअघि विन्डहोकमा टस ब्याटिङको निम्तो पाएको नामिबियाले ५० ओभरमा ९ विकेट गुमाउँदै १९९ रन बनाएको थियो । नामिबियाका ज्यान फ्रेलिंकले ८८ बलमा ७ चौकासहित सर्वाधिक ७० रन बनाए । जेजे स्मितले ७५ बलमा ३ चौका र ३ छक्कासहित ४९ रन जोडे ।
अमेरिकाका सौरभ नेत्रवालकर, जुआनोय ड्रिसडेल र मिलिन्ड कुमारले २–२ विकेट लिए । अमेरिका, यूएई र नामिबियाबीच यस लिग २को त्रिकोणात्मक सिरिजमा प्रतिस्पर्धा आजदेखी सुरु भएको छ ।
अर्को लिग २ को त्रिकोणात्मक सिरिजमा क्यानडा, नेपाल र ओमानबीच प्रतिस्पर्धा हुँदैछ । नेपाल र क्यानडाबीच ८ : ४५ मा खेल सुरु हुनेछ ।
