काठमाडौं । दीपेन्द्र लामाले निर्देशन गर्ने आगामी फिल्म ‘दुःखी आत्मा’मा अनुपविक्रम शाही अनुबन्धित भएका छन् । २४ भदौबाट छायांकन सुरु हुन लागेको फिल्ममा यसअघि दयाहाङ राई र आँचल शर्मा जोडिएका छन् ।
कथाको मागअनुसारको चरित्र चयन गर्ने क्रममा अभिनेता शाही उपयुक्त देखिएकाले उनलाई कास्ट गरिएको पटकथा लेखक समेत रहेका निर्देशक लामाले जानकारी दिए ।
क्लक वर्क क्रिएसन्सको ब्यानरमा हिमाल कडरिया निर्माता रहेको फिल्मलाई आलोक शुक्लाले खिच्नेछन् । निर्देशक लामाको अघिल्लो फिल्म ‘नांगो गाउँ’लाई रुचाइएको थियो ।
दयाहाङ र अनुपविक्रमले भने ‘वीरविक्रम’ र ‘लप्पनछप्पन’पछि ‘दुःखी आत्मा’मा सँगै अभिनय गर्न लागेका हुन् । काठमाडौंको सेरोफेरोमा खिचिने यो सामाजिक कथावस्तुको फिल्ममा बुद्धि तामाङ, पुष्कर गुरुङ, कविता आले, शिशिर बाङ्देलको समेत अभिनय छ ।
अनुप यतिबेला हिमालय टिभीमा प्रसारण हुन लागेको टिभी रियालिटी शो ‘रोडिज’को नयाँ सिजनमा व्यस्त छन् ।
