१५ भदौ, बुटवल । क्रिकेटर सोमपाल कामी टेन प्लास्ट इण्डस्ट्रिजका उत्पादनको ब्राण्ड एम्बास्डरमा अनुबन्धित भएका छन् ।
भैरहवामा एक औपचारिक समारोहमा उद्योगका अध्यक्ष धिरज अग्रवालले क्रिकेटर कामीलाई उद्योगको प्लम्बिङ पाइप हस्तान्तरण गर्दै एम्बास्डरमा अनुबन्धित भएको सार्वजनिक गरेका हुन् ।
ब्राण्ड एम्बास्डरमा अनुबन्धनको सम्झौता १५ महिनासम्म लागू हुने सोमपालले बताए ।
उनले उद्योगका अध्यक्ष धिरज अग्रवाल क्रिकेटप्रेमी भएका, उद्योगको नाम र आफ्नो जर्सी नम्बरको अंकसमेत मिलेकाले स्वदेशी उत्पादनको प्रवर्धनमा आफू अनुबन्धित भएको बताए ।
उद्योगका अध्यक्ष अग्रवालका अनुसार एक अर्ब लगानीमा २०७७ सालमा स्थापना भएको उद्योगले नेपालमै पहिलोपटक इटालियन प्रविधिबाट प्लम्बिङसम्बन्धी सबै सामान एउटै उद्योगबाट उत्पादन गरिरहेको छ । साथै सय जना बढीलाई प्रत्यक्ष रोजगारी दिएको उनले बताए ।
नेपाल गुणस्तर चिह्नसमेत प्राप्त गरेको उद्योगले थाइल्याण्ड, भियतनामलगायत देशबाट कच्चा पदार्थ आयात गरिरहेको अग्रवालले बताए ।
