काठमाडौँ । कृषि तथा पशुपन्छी विकास मन्त्री रामनाथ अधिकारीले नेपालमा रहेका स्थानीय तथा रैथाने जातका बालीको संवर्द्धन गर्दै उच्च उत्पादन दिने बिउ तथा प्रविधिको आयात गरी उत्पादन बढाउनु पर्ने बताउनुभएको छ ।
आज काठमाडौँमा सुरु भएको अन्तर्राष्ट्रिय बीउ सम्मेलनलाई सम्बोधन गर्दे मन्त्री अधिकारीले हावापानी र भौगोलिक अवस्थितिका कारण गुणस्तरीय बीउ बिजन उत्पादनका लागि नेपाललाई उत्कृष्ट गन्तव्यको रुपमा विकास गर्ने सकिने उल्लेख गर्दे मन्त्री अधिकारीले यसका लागि सरकारी ,सहकारी र निजी क्षेत्रबीच सहकार्य आवश्यक छ भन्नुभयो ।
मन्त्री अधिकारीले खाद्य तथा पोषण सुरक्षाको सुनिश्चितताका लागि कृषि उपजको उत्पादन र उत्पादकत्व वृद्धि नै पहिलो सर्त भएपनि जलवायु परिवर्तन र खाद्य तथा कृषि प्रणालीमा आएको व्यापक परिवर्तनले हाम्रो कृषि र कृषि प्रणाली प्रभावित भइरहेको उल्लेख गर्नुभयो । उहाँले कृषि क्षेत्रमा बदलिँदो परिस्थितिको सामना गर्दे कृषि उत्पादनको वृद्धि मार्फत खाद्य तथा पोषण सुरक्षा सुनिश्चितताको लागि उन्नत जातका गुणस्तरीय बीउ बिजनको प्रयोग र विस्तारको आवश्यकतामा जोड दिनुभयो ।
बीउ बिजन क्षेत्रमा नेपालमा विद्यमान सम्भावनाको खोजी तथा सदुपयोग गर्न, प्रविधि विकास तथा हस्तान्तरण गर्न र साझेदारी तथा सहकार्यमा बीउ उत्पादन कार्यमार्फत नेपालको खाद्य सुरक्षा तथा आयात प्रतिस्थापनमा सम्मेलन फलदायी हुने अपेक्षा व्यक्त गर्नुभयो ।
कृषि तथा पशुपन्छी विकास मन्त्रालय, नेपाल कृषि अनुसन्धान परिषद्, नेपाल बीउ व्यवसायी संघ लगायतको सहकार्यमा सम्मेलनको आयोजना गरिएको हो ।
