१२ माघ, काठमाडौं । काठमाडौंमा जारी जय नेपाल कप टी२० क्रिकेटमा मध्यपश्चिम विश्वविद्यालयले भारतको लखनउ विश्वविद्यालयलाई हराएको छ ।
शनिबार भएको खेलमा मध्यपश्चिमले लखनउलाई २ विकेटले पराजित गरेको हो । लखनउले दिएको १४२ रनको लक्ष्य मध्यपश्चिमले १९.४ ओभरमा ८ विकेट गुमाएर पूरा गर्यो । निश्चल रावलले सर्वाधिक ४९ तथा दीपक डुम्रेले ४३ रन बनाए ।
लखनउका लागि सञ्जय विश्वकर्माले ४ विकेट लिँदा अभिषेक सोनीले २ तथा अभिषेक प्रकाश र अनन्द सागरले १-१ विकेट लिए ।
त्यसअघि टस जितेर ब्याटिङ रोजेको लखनउले निर्धारित २० ओभरमा ८ विकेट गुमाएर १४१ रन जोडेको थियो । आदित्य प्रताप सिंहले सर्वाधिक ६२ रन बनाए ।
मध्यपश्चिमका लागि राजकुमार शाहले ३ तथा कप्तान विपिन खत्री, दिनेश अधिकारी र दिवान पुनले १-१ विकेट लिए ।
यस जितसँगै मध्यपश्चिम समूहविजेताको रूपमा सेमिफाइनलमा पुगेको छ । लखनउ पनि हारका बाबजुद उपविजेताका रूपमा सेमिफाइनल पुगेको छ ।
आजै भएको दोस्रो खेलमा काठमाडौं विश्वविद्यालयले दिल्लीलाई ३९ रनले पराजित गरेको छ।
