चितवन । चितवनमा छुट्टाछुट्टै दुर्घटनामा दुई जनाको मृत्यु भएको छ ।
यहाँको भरतपुर महानगरपालिका–१६, झनझने चोकमा मोटरसाइकलको ठक्करबाट गम्भीर घाइते भएका साइकलयात्रीको उपचारका क्रममा मृत्यु भएको छ ।
कार्की चोकबाट झनझने चोकतर्फ आउँदै गरेको ना३७प ४३७१ नम्बरको मोटरसाइकलले विपरीत दिशातर्फ जाँदै गरेको साइकललाई ठक्कर दिँदा गम्भीर घाइते भएका भरतपुर महानगरपालिका–१६ बस्ने ५० वर्षीय बाबुराम हमालको नयाँ मेडिकल कलेजमा उपचारका क्रममा मृत्यु भएको जिल्ला प्रहरी कार्यालय चितवनले जनाएको छ ।
प्रहरीले मोटरसाइकल तथा चालक भरतपुर महानगरपालिका–१६ बस्ने ३५ वर्षीय नवीन भन्ने बुद्धिप्रसाद घलेलाई नियन्त्रणमा लिई आवश्यक कारबाही प्रक्रिया अगाडि बढाइएको जनाएको छ ।
यस्तै, रत्ननगर नगरपालिकास्थित त्रिनेत्र पेट्रोल पम्प अगाडि मोटरसाइकलको ठक्करबाट गम्भीर घाइते भएका एक वृद्धको उपचारका क्रममा निधन भएको छ ।
पूर्व–पश्चिम सडक खण्डमा भरतपुरबाट टाँडीतर्फ आउँदै गरेको बागमती प्रदेश ०६–००२ प ४८६७ नम्बरको मोटरसाइकलको ठक्करबाट बाटो काट्दै गरेका पैदलयात्री रत्ननगर–१० बस्ने ९० वर्षीय वैकुण्ठनाथ लम्साल गम्भीर घाइते भई नयाँ मेडिकल कलेज (सिएमसी)मा उपचार भइरहेकोमा शनिबार राती १०ः३० बजे मृत्यु भएको हो ।
प्रहरीले ठक्कर दिने मोटरसाइकल र चालक रत्ननगर नगरपालिका–१३, जयमंगला बस्ने २८ वर्षीय अमृत सिम्खडालाई नियन्त्रणमा लिई आवश्यक कारबाही प्रक्रिया अगाडि बढाइएको प्रहरीले जनाएको छ ।
