मकवानपुर । मकवानपुरमा दुई वटा सवारी साधन एकापसमा ठोक्किएर दुर्घटना हुँदा एक जनाको मृत्यु भएको छ । दुर्घटनामा अन्य १३ जना घाइते भएका छन् ।
यसअघि ८ जना भनिएकोमा घाइतेको सङ्ख्या १३ रहेको जिल्ला प्रहरी कार्यालय मकवानपुरले जनाएको छ ।
पूर्वपश्चिम राजमार्ग अन्तर्गत मकवानपुरको मनहरी(६, डिपार्टमा दिउसो करिब १ बजेतिर वीरगन्जबाट चितवनतर्फ जाँदै गरेको बागमती प्रदेश ०१-०२६ च ५२५० नम्बरको स्कारपियो र चितवनबाट हेटौडातर्फ आउँदै गरेको बा १६ च ८३२४ नम्बरको कार एकआपसमा ठक्कर खाएका थिए ।
दुर्घटनामा कार चालक हेटौँडा–४, स्कुल रोड बस्ने अन्दाजी वर्ष ६० का सुरेन्द्रलाल श्रेष्ठको मृत्यु भएको जिल्ला प्रहरी कार्यालय मकवानपुरले जानकारी दिएको छ । गम्भीर घाइते श्रेष्ठको उपचारका क्रममा चितवन स्थित एलाईभ अस्पतालमा मृत्यु भएको प्रहरीले जनाएको हो ।
दुर्घटनामा घाइते भएकाहरूको चितवन स्थित एलाईभ अस्पतालमा उपचार भइरहेको प्रहरीले जानकारी दिएको छ ।
