काठमाडौं । प्रकाश सपुत निर्देशित फिल्म ‘वसन्त’को पोस्टर सार्वजनिक भएको छ । फिल्म प्रदर्शन हुन ठीक २ महिना बाँकी रहँदा पोस्टर सार्वजनिक गर्दै उनले प्रवर्धन सुरु भएको जनाएका छन् ।
पोस्टरमा सपुत स्वयम फिचर्ड छन् । लक्ष्मीप्रसाद देवकोटा र पारिजातको भित्ते तस्वीर सामुन्ने उनको पात्र अध्ययन कर्ममा ब्यस्त देखिन्छ । यो पोस्टरले चरित्र चित्रण र उसको मनोदशालाई दर्शाउन प्रयत्न गरेको छ ।
फिल्ममा सपुतको निर्माण, निर्देशनसहित अभिनय, लेखन, गायन र संगीत छ । सपुतले पोस्टर सार्वजनिक गर्दै यो फिल्म निर्माणको क्रमका हैरानी र दुःखका किस्सा उल्लेख गरेका छन् ।
उनले ‘पूर्णबहादुरको सारंगी’को प्रचारमा समय दिन नपाएको सन्दर्भ कोट्याउँदै लेखेका छन्– सबैभन्दा महत्वपुर्ण योजना विपरित बीचमा एउटा चलचित्रको प्रदर्शनमा मैले समय दिन नपाएपछि केहि शुभेच्छुकहरुको नजरबाट मेरो इमान खोसेको छ । यसबाहेक भोक खोसेको छ ! निद्रा खोसेको छ र म भित्रको एक शान्त मानिस खोसेको छ ! मलाई विश्वास छ ‘बसन्त’मार्फत नै समयले खोसिएका सबै फेरि फिर्ता दिनेछ !’
फिल्ममा स्वस्तिमा खड्का, खड्गबहादुर पुन, प्रभात पाल, श्री शिभांसी, उर्मिला लाम्गादेको समेत अभिनय छ । गलबन्दी प्रोडक्सनको ब्यानरमा बनेको फिल्ममा मोहन विश्वकर्मा र विन्दू बोहरा छन् । कार्यकारी निर्मातामा अनुरोध भट्टराई, नाना थकाली र वीरेन्द्रनारायण श्रेष्ठ छन् । यो फिल्म २२ चैत (अप्रिल ४)मा प्रदर्शन हुने जनाइएको छ ।
