भद्रपुर, झापा । झापाको कचनकवलमा जङ्गलमा दाउरा खोज्न गएकी एक महिलाको हात्तीको आक्रमणबाट मृत्यु भएको छ ।
आज दिउँसो कचनकवल गाउँपालिका–७ तारावनास्थित दिपज्योति सामुदायिक वनमा स्थानीय १५–२० जना महिला दाउरा र घाँस काट्न गएकोमा सोही ठाउँ बस्ने ३५ वर्षीया केलावत्ती राजवंशीको जङ्गली हात्तीको आक्रमणबाट मृत्यु भएको जिल्ला प्रहरी कार्यालय झापाले जनाएको छ ।
उनी हराएको भनी स्थानीयले इलाका प्रहरी कार्यालय बनियानीमा जानकारी गराउनासाथ प्रहरी टोली खटिएर खोजतलास गर्ने क्रममा वनक्षेत्र नजिकै जङ्गली हात्तीले आक्रमण गरी गम्भीर घाइते अवस्थामा राजवंशी फेला परेकी थिइन् । उनको उपचारको क्रममा आज साँझ प्रादेशिक अस्पताल भद्रपुरमा मृत्यु भएको प्रहरीले जनाएको छ ।
राजवंशीलाई हात्तीले लखेटेर आक्रमण गरेको बुझिएको छ ।
