काठमाडौं । कार्तिक ३० गतेदेखि प्रदर्शन तयारीमा रहेको फिल्म ‘केटी हराएको सूचना’को पोस्टर सार्वजनिक भएको छ । ट्राइ सिटी पिक्चर्सको ब्यानरमा फिल्म निर्माण भएको हो ।
पोस्टरमा रेलको लिकमा नाजिर हुसेन र सृष्टि श्रेष्ठको पात्रलाई रमाउँदै हात समातेर हिँडेको देख्न सकिन्छ । पृष्ठभूमिमा अर्का कलाकार दुरा सञ्जय गुप्ता मोटरसाइकलमा देखिन्छन् ।
सञ्जयको पछाडि जनकपुर-जयनगर रुटमा चल्ने रेललाई राखिएको छ । कलाकार र रेलको पृष्ठभूमिमा पहाड र तराईको दृश्य छ । तीन दशकअघिको हिट सिरियल ‘उजेली’ निर्देशक दीपेन्द्र गौचनले यो फिल्मबाट पुनरागमन गर्दैछन् ।
गौचनकै निर्माण रहेको फिल्ममा उनकै पटकथा लेखन छ । फिल्ममा रामनारायण ठाकुर, मदन ठाकुर, रीना रिमाल, कौशल्या ठाकुर, ललितादेवी मिश्र, रुपेश मण्डल, सुदीप पटेल, अनिल कुर्मी, मनोज शाह, अर्जुन पोखरेल र ओमप्रकाश कर्णको पनि अभिनय छ ।
नकिम उद्दिन कार्यकारी निर्माता रहेको फिल्ममा मनोहरदास मुल, अनिन राजभण्डारी, राजिव थापा, रोबिन थापा, राधेश पन्त, महेन्द्र शाक्य, ज्योतिमान शेरचन, चन्द्र भट्टचन, सञ्जय भट्टचन सह–कार्यकारी निर्माता छन् ।
यसअघि फिल्मको संवादरहित टिजर र ‘हेर्दै जाऊँ’ बोलको गीत सार्वजनिक भइसकेको छ । म्युजिक नेपाल डिजिटल पार्टनर रहेको फिल्म एप्पल इन्टरटेनमेन्ट, एफडी कम्पनी र रिच इन्टरटेनमेन्टले वितरण गर्दैछन् ।
