१ असोज, काठमाडौं। त्रिभुवन आर्मी क्लबले कोशी प्रदेशलाई हराउँदै महिला लिगमा आफ्नो चौथो जित दर्ता गरेको छ । सातदोबाटोस्थित एन्फा कम्प्लेक्समा भएको खेलमा आर्मीले कोशीलाई ५-० ले हराएको हो ।
आर्मीको लागि विमला चौधरी र अनिता लम्लेजले समान २÷२ गोल गरे । पहिलो हाफको आठौं र १० औं मिनेटमा विमला चौधरीले गोल गर्दै अग्रता दिलाइन् ।
खेलको २१ औं मिनेटमा हिमा चौधरीले गोल गरिन् । ३८औं मिनेटमा अनिताले गोल गर्दै पहिलो हाफमा नै आर्मीले ४–०को अग्रता बनाएको थियो ।
दोस्रो हाफमा अनिता लम्जेलले ६० औं मिनेटमा गोल गरिन् । त्यसपछि भने कोशीले निकै राम्रो डिफेन्सिभ खेल खेल्यो । आजको पहिलो खेलमा विभागीय क्लब एपिएफले संकटा क्लबलाई ३-० ले हराएको थियो ।
आजको जितसँगै आर्मीले ६ खेलमा ४ जितसहित अंक तालिकाको दोस्रो स्थानमा उक्लिएको छ ।
आर्मीले ६ खेलमा ४ जित १ हार १ बराबरी खेलेको छ । त्यस्तै कोशी प्रदेश भने ६ खेलमा ३ जित १ बराबरी र २ हारसहित चौथो स्थानमा रहेको छ ।
