२६ भदौ, काठमाडौं । इन्डियन सुपर लिग (आईएसएस) शैलीमा २०७७ सालमा मा नेपालमा पनि नेपाल सुपर लिग (एनएसएस) फ्रेन्चाइज फुटबलको सुरुआत भयो ।
कोरोना महामारीको समयमा पनि २०७७ चैत देखि २०७८ जेठसम्म पहिलो संस्करणको एनएसएलको सफलतापूर्व सम्पन्न भयो । जसमा काठमाडौं रेजर्स च्याम्पियन बनेको थियो । पहिलो संस्करणमा ७ फ्रेन्चाइज टोलीले सहभागिता जनाएका थिए ।
दोस्रो संस्करणको एनएसएल २०२३ नोभेम्बर २४ देखि डिसेम्बर ३० (२०८० मंसिर ८ देखि पुष १४ गते)सम्म काठमाडौंमा आयोजना भएको थियो ।
नेपाली फुटबल पिरामिडमा शहीद स्मारक ए डिभिजन लिग शीर्ष श्रेणीको फुटबल लिग हो । तर, नियमित रुपमा लिग हुन नसक्दा सुरु भएको एनएसएलले नेपाली फुटबलमा छुट्टै माहोल बनाएको थियो ।
फ्रेन्चाइज टिमहरुको खर्च देखि लिएर खेलाडीहरुले आकर्षक आर्थिक आर्जन गरेका थिए । एनएसएलले नेपाली फुटबलमा छुट्टै रौनक थपेको थियो ।
मैदानको साइडमा चियर लिडर राख्नेदेखि लिएर मैदानमा डिजिटल रनिङ बोर्ड, फुड कोर्ट राख्ने जसत् अन्तर्राष्ट्रिय स्तरको प्रयोग भएको थियो ।
फुटबल खेलाडीहरुको लागि पनि एनएसएल एउटा प्रतिक्षा गर्ने प्रतियोगिता बनिसकेको थियो ।
दोस्रो संस्करणपछि अब एनएसएलको तेस्रो संस्करण कहिले हुन्छ भनेर धेरैको चासो छ । अखिल नेपाल फुटबल संघ एन्फाले यस सिजनका लागि एन्फाको वार्षिक क्यालेन्डरमै एनएसएलका लागि असोज-कात्तिकको मिति उल्लेख गरेको छ । तर, दशैं-तिहार जसत् ठूला चाडपर्व यही समयमा पर्ने भएकोले एनएसएलका लागि यो उचित समय भने थिएन ।
तेस्रो संस्करणको एनएसएल हुन्छ कि हुँदैन भन्ने अन्योल भइरहेको बेला एउटा आशा भने पलायको छ ।
एनएसएसलका आयोजक नेपाल स्पोर्ट्स एण्ड इभेन्ट म्यानेजमेन्ट (एनएसइएम) र अखिल नेपाल फुटबल संघ (एन्फा) प्रतिनिधबीच एनएसएसलको तेस्रो संस्करणको आयोजनाबारे मंगलबार पहिलो पटक औपचारिक रुपमै छलफल भएको छ । यसले एनएसएल आयोजना हुने आशा जगाएको छ ।
एन्फाले एनएसएलका लागि छुट्याएको असोज-कात्तिकको समयम नभए पनि अलि पछि एनएसएल आयोजना गर्नका लागि दुई पक्षबीच प्रारम्भिक चरणमा छलफल भएको हो ।
एन्फा र एनएसईएमबीच तेस्रो संस्करणको एनएसएल आयोजनाका लागि मितिको विषयमा छलफल भएको एन्फा प्रवक्ता सुरेश शाहले जानकारी दिए । ‘एनएसएलको तेस्रो संस्करण कहिले गर्ने भनेर मितिको विषयमा पहिलो पटक छलफल भएको हो । बाँकी कुराहरु मितिको टुङ्गो लागेपछि छलफल हुनेछ,’ एन्फा प्रवक्ता सुरेश शाहले अनलाइनखबरसँग भने ।
एन्फाले उपलब्ध गराएको मितिमै एनएसएल हुने सम्भावना कम रहेपनि सरोकारवालाहरु अहिले प्रतियोगिता आयोजनाका लागि उपयुक्त मितिको खोजीमा छन् ।
एन्फाले आफ्नै कार्यक्रमअन्तर्गत रहेका लिगहरू आयोजना गर्न सकेको छैन । यस्तै एन्फा महिला लिग भर्खरै सुरु भएको छ । अक्टोबरमा एन्फाले काठमाडौंमै साफ महिला च्याम्पियनसिप आयोजना गर्दैछ ।
शहीद स्मारक बी डिभिजन लिग हुनै बाँकी छ । नयाँ सिजनको शहीद स्मारक ए डिभिजन लिग कहिले हुने टुङ्गो छैन । यस्तै, एन्फाले बी डिभिजन लिग अझै आयोजना गर्न सकेको छैन । त्यसका लागि समेत बी डिभिजनका क्लबहरुसँग बसेर छलफल गर्दै मिति टुङ्गयाउने तयारीमा छ ।
त्यसैले एन्फाले आफ्नै कार्यक्रमहरुलाई पनि मध्यनजर गर्दै एनएसएलका लागि मिति उपलब्ध गराउने विषयमा छलफल गरिरहेको छ ।
एन्फा प्रवक्ता शाहले जाडो महिनापछि एनएसएल गर्ने विषयमा छलफल भइरहेको जानकारी दिए । ‘एन्फाकै आफ्नै कार्यक्रमहरु पनि छ । नोभेम्बर विन्डोमा राष्ट्रिय टिमको खेल पनि हुनेछ । त्यसैले अलि पछि गर्नेकि भन्ने छ,’ शाहले भने ।
सेप्टेम्बर विन्डोमा नेपाली राष्ट्रिय टिमले कुनै मैत्रीपूर्ण खेल खेलेन । अक्टोबरमा काठमाडौंमै साफ महिला च्याम्पियनसिप आयोजना हुँदैछ । एन्फाले नोभेम्बरको फिफा विन्डोमा थ्री नेसन्स फुटबल प्रतियोगिता पनि आयोजना गर्ने तयारी गरिरहेको छ । त्यसैले एनएसएलका लागि फेब्रुअरी पछि गर्ने गरी छलफल भएको छ ।
एन्फाले मंगलबार दुईपक्षबीच एनएसएलको विषयमा दुई पक्षबीच छलफल भएको भन्दै फोटो सार्वजनिक गरे पनि यस विषयमा धेरै जानकारी भने सार्वजनिक भएको छैन । खेलाडीको अक्सन, परतियोगिताको मोडालिटी जस्ता विषयमा भने पछि छलफल हुने जनाइएको छ ।
एनएसएलको पहिलो संस्करणमा ७ टोलीले प्रतिस्पर्धा गरेका थिए । त्यसबाट हौसिएर दोस्रो संस्करणमा १० टिम बनाउने गरी आयोजकले ३ नयाँ टिम थप गरेको थियो । तर, पहिलो संस्करण खेलेको विराटनगर सिटी एफसीले दोस्रो संस्करणमा सहभागिता नजनाएपछि ९ टिमले प्रतिस्पर्धा गरेका थिए ।
अब तेस्रो संस्करणमा कति टिमले प्रतिस्पर्धा गर्ला ? त्यो हेर्न बाँकी छ ।
