काठमाडौं। ३० वर्षे सेवा अवधि हटाउन माग गर्दै प्रहरी अधिकारीहरुले दायर गरेको रिटमा सर्वोच्च अदालतका न्यायाधीश हरिप्रसाद फुयालको इजलासले अन्तरिम आदेश दिएको छ।
बिहीबार सुनुवाइ गर्दै न्यायाधीश फुयालको इजलासले ३० वर्षे सेवा अवधिका कारण अवकाश दिने व्यवस्था तत्काललाई कार्यान्वयन नगर्न आदेश दिएको हो।
उमेर हद बाँकी रहेपनि सेवा अवधि ३० वर्ष पूरा भएको कारण अवकाश जानुपर्ने दिन नजिकिएसँगै वरिष्ठ प्रहरी उपरीक्षक जीवनकुमार श्रेष्ठसहित २१ जना प्रहरी अधिकारीहरुले रिट दायर गरेका थिए।
प्रहरी उपरीक्षक श्रेष्ठसहित ९० जना प्रहरी अधिकारीहरु आगामी भदौ १५ गतेदेखि सेवा अवधिका कारण अवकाश जाँदै थिए। अदालतको आदेशले उनीहरुको जागिर तत्कालका लागि थामिएको छ।
सर्वोच्चले उक्त रिटलाई अग्रधिकार दिँदै पूर्ण सुनुवाइका लागि आगामी असोज १० गते पेशी तोक्न आदेश जारी गरेको छ।
