काठमाडौं । मालपोत कार्यालय, पर्साका तत्कालीन कार्यालय प्रमुखद्वय प्रकाशप्रसाद पोखरेल र गमबहादुर बिश्वकर्माबिरुद्ध अख्तियार दुरुपयोग अनुसन्धान आयोगले मंगलबार बिशेष अदालतमा मुद्दा दर्ता गरेको छ ।
आयोगले आर्थिक बर्ष २०७२–०७३ मा जग्गा किनवेचका क्रममा विभिन्न लिखतबाट उठेको राजस्व रकम (रजिष्ट्रेशन दस्तुर र पुँजीगत लाभकर) नियमानुसार दाखिला नगरी हिनामिना गरेको भन्ने उजुरी निवेदनमा अनुसन्धान गरेको थियो । सो अवधिको जग्गा किनबेचको क्रममा उठाएको राजस्व रकम दाखिला नगरी हिनामिना गरी भ्रष्टाचारजन्य कसुरमा संलग्न मुद्दा दायर गरेको आयोगले जनाएको छ ।
मालपोत कार्यालय, पर्साका तत्कालीन कार्यालय प्रमुख प्रकाश प्रसाद पोखरेलले मालपोत कार्यालय, पर्सामा दैनिक लिखत रजिष्ट्रेशन पारित हुँदा राजस्ववापत प्राप्त हुने रकम उठाउने र बुझाउने सन्दर्भमा निरन्तर अनुगमन गर्नुपर्नेमा कुनै अनुगमन नगरेको अनुसन्धानमा देखिएको आयोगले जनाएको छ । सो अवधिमा संकलन भएको राजस्व रकममध्ये रु ९३ लाख ६६ हजार २ सय ९ रुपैयाँ हिनामिना हुँदा समेत प्रतिवादी मदनप्रसाद गुप्तालाई राजस्व हिनामिनामा प्रोत्साहन गरी राजस्व दुरुस्तरुपमा दाखिला नगराएको देखिंदा पोखरेलबिरुद्ध मुद्दा दर्ता गरेको आयोगको विज्ञप्तिमा उल्लेख छ । पोखरेलबिरुद्ध रु ९३ लाख ६६ हजार २ सय ९ रुपैयाँ नै बिगो कायम गरी मुद्दा दर्ता भएको छ ।
आयोगले मालपोत कार्यालय, पर्साका तत्कालीन कार्यालय प्रमुख गम बहादुर विश्वकर्माबिरुद्ध पनि मुद्दा दर्ता गरेको छ । विश्वकर्माले मालपोत कार्यालय, पर्सामा दैनिक लिखत रजिष्ट्रेशन पारित हुँदा राजस्ववापत प्राप्त हुने रकम उठाउने र बुझाउने सन्दर्भमा निरन्तर अनुगमन गर्नुपर्नेमा कुनै अनुगमन नगरी आ.व. २०७२–०७३ को उनको कार्यकालमा संकलन भएको राजस्व रकममध्ये रु. १ लाख ४१ हजार ८ सय २५ राजस्व हिनामिना हुँदा समेत प्रतिवादी मदनप्रसाद गुप्तालाई राजस्व हिनामिनामा प्रोत्साहन गरेको अख्तियारले जनाएको छ ।
मालपोत कार्यालय, पर्साका तत्कालीन नायव सुब्बा मदनप्रसाद गुप्ताले मालपोत कार्यालय, पर्सामा लिखत रजिष्ट्रेशन पारित हुँदा प्राप्त हुने राजस्व उठाउने र उठेको राजस्वको विस्तृत विवरणसहित लेखा शाखामा बुझाउने कर्तव्य भएका उनले उठाएको राजस्व प्रचलित कानूनबमोजिम दाखिला नगरी रु. ९५ लाख ८ हजार ३४ रुपैयाँ हिनामिना गरेको अख्तियारले जनाएको छ । उनलाई पनि बिगोबमोजिमको जरिवाना माग गरी मुद्दा दर्ता गरिएको छ ।
मालपोत कार्यालय, पर्साका तत्कालीन लेखापाल नागेन्द्रप्रसाद चौधरीबिरुद्ध मुद्दा दायर गरिएको छ । मालपोत कार्यालय, पर्सामा लिखत रजिष्ट्रेशन पारित हुँदा प्राप्त हुने राजस्व लेखा शाखामा बुझाउन ल्याउँदा चलानी र रसिद भिडाएर राजस्व बुझ्नुपर्छ भन्ने कानूनी व्यवस्था विपरीत ९५ लाख ८ हजार ३४ रुपैयाँ हिनामिना गरेको आरोप छ । उनीबिरुद्ध पनि त्यति नै बिगो कायम गरी मुद्दा दर्ता गरेको छ ।
